डिआइजी विश्वराज पोखरेल एआइजीमा बढुवा
हिजो विहिबार बसेको मन्त्रिपरिषदको बैठकले डिआइजी विश्वराज पोखरेललाई एआइजीमा बढुवा गर्ने निर्णय गरेको छ ।
उनलाई हिजो साँझ बसेको बैठकले बढुवाको निर्णय गरेको हो ।बढुवाको निर्णयसँगै पोखरेल हालका आइजीपी शैलेश थापा क्षेत्रीपछि आइजीपी बन्ने निश्चितप्रायः भएको छ ।
उनलाई गृहसचिव महेश्वर न्यौपानेको अध्यक्षतामा बसेको बढुवा समितिले १५ मंसिरमा एआइजी बढुवामा सिफारिश गरेको थियो । त्यसअघि २७ कात्तिमा सरकारले एआइजीको एक दरबन्दी थप्ने निर्णय गरेको थियो ।
पोखरेललाई प्रहरी अतिरिक्त महानिरीक्षक एआइजीमा बढुवा हुनबाट रोक्ने कसरत भएको थियो । बुधवार संसदको राज्य व्यवस्था समितिले गृहमन्त्री रामबहादुर थापा बादलसँग बढुवा सिफारिशबारे जानकारी मागेको थियो ।
समितिकी सभापति शशि श्रेष्ठले एआइजी बढुवाको सिफारिश रोक्न निर्देशन दिएकी थिइन् । पूर्व माओवादीनिकट सांसदहरुले पनि दरबन्दी बढाउने सरकारको निर्णयको कडा आलोचना गरे । त्यसको भोलिपल्टै उनको बढुवा निर्णय भएको छ ।
