अमेरिकामा कोरोना उच्च जोखीम, क्यालिफोर्निया राज्यले गर्यो नागरिकलाई घरमै बस्न आग्रह
बर्तमान समयमा कोरोना भाइरसले विश्वमाहारीकोरुप लिइरहेको अवस्थामा अमेरिकामा पनि यसको संक्रमण बढ्दै गएपछि क्यालिफोर्निया राज्यका नागरिकलाई घरभित्रै रहन भनिएको छ ।
कोरोना भाइरसको संक्रमण थप फैलिन नदिन गभर्नर गभिन न्युसमले क्यालिफोर्निया राज्यले नागरिकहरुलाई अनावश्यक रुपमा घरबाट बाहिर ननिक्लिन भनेको छ । नागरिकले भाइरसको महामारीका बीच आवश्यक पर्दा मात्र घरबाहिर निस्कन सक्ने बताए ।
गभर्नर न्युसमले यसअघि नै ४ करोड जनसंख्या रहेको राज्यमा आउँदो २ महिनामा आधाभन्दा बढी भाइरसको संक्रमणमा आउन सक्ने बताएका थिए । ‘यो हामीले कडा निर्णय लिने समय हो । हामीले वास्तविकतालाई बुझ्नु आवश्यक छ’, गर्भनर न्युसमले भने ।
अहिलेसम्म कोरोनाका कारण अमेरिकामा २ सय १८ जनाको मृत्यु भएको छ भने १३ हजार ३ सय १६ जनामा संक्रमण पाइएको छ । संक्रमित १ सय २१ जना उपचारपछि घर फर्किएका छन् ।
कोरोनाका कारण अमेरिकाले यो वर्ष हुने भनिएको जी–७ देशहरुको सम्मेलन पनि रद्द गरेको छ । अब यो सम्मेलन भिडियो कन्फ्रेन्सको माध्यमबाट गरिनेछ ।
यो सम्मेलन आउँदो जुन महिनामा क्याम्प डेविडमा हुने तय भएको थियो ।
