युएईकी छैठौँ रानी दुई छोराछोरी लिई फरार, जर्मनीमा रहने अनुमान
दुबईका अर्बपति शासक शेख मुहम्मद बिन राशिद अल मकुतुमकी पत्नी ह्या बिन्त अल हुसैन दुई बच्चासहित करिब ३ सय करोड रुपैँया लिएर फरार भएकी छिन् । उनी संयुक्त अरब इमिरेट्स युएइ की छैठौँ रानी हुनुका साथै जोर्डनका राजा अब्दुल्लाहकी सौतनी बहिनी समेत हुन् ।
शेख मुहम्मद युएइका उपराष्ट्रपति र प्रधानमन्त्रीको जिम्मेवारीमा रहेका छन् । उनी दुनियाँका धनी शासकहरुमध्ये एक मानिन्छन् । अन्तराष्टिय सञ्चारमाध्यमहरुका अनुसार बेपत्ता रानी बेलायतको राजधानी लण्डनमा हुन सक्ने अनुमान गरिए पनि उनलाई पछिल्ला दिनमा दुबईबाट सिधै जर्मनी गएको अड्कल गरिएको छ ।
उनका साथमा ११ वर्षीया छोरी जलिला र ७ वर्षीय छोरा जायद रहेका छन् । जर्मनीमा उनले सरकारसँग राजनीतिक शरण मागेको समेत बताइएको छ । ब्रिटेनको अक्सफोर्ड विश्वविद्यालयमा अध्ययन गरेकी उनी मे २० देखि सामाजिक सञ्जालहरुमा समेत देखिएकी थिइनन् ।
अरब मिडियाहरुको अपुष्ट समाचार अनुसार ह्यालाई दुबईबाट निकाला गरिएको हो । दुबईबाट उनलाई निकाल्न जर्मनीका एक कुटनीतिज्ञको समेत हात रहको बताइएको छ । यसले गर्दा दुबई र जर्मनबीबीचको कुटनीतिक सम्बन्धमा समेत दरार पैदा हुने खतरा देखिएको छ ।
यसअघि शेखको छोरी राजकुमारी लतिफाले पनि देश छोडेर भाग्ने कोशिस गरेकी थिइन् । उनलाई भारतको गोवाबाट उद्धार गरेर संयुक्त अरब इमिरेट्सको शाही परिवारलाई बुझाइएको थियो ।
उनले आफ्नो पिताको अन्याय र अत्याचार खप्न नसकेर भाग्नुपरेको बयान दिएकी थिइन् । त्यसको केही समयपछि रानीले समेत देश त्याग्नुलाई अर्थपूर्णरुपमा लिइएको छ । रानीको खोजीमा लाग्न युएई रोयल फ्यामेलीले सम्बन्धित निकायहरुलाई निर्देशन दिएको समेत जनाइएको छ ।
