सूचना चुहाएको आरोपसहित नेकपाद्वारा चार कार्यकर्ता निष्काशित
नेपाल कम्युनिष्ट पार्टीले पार्टीको मध्य केन्द्रीय कमाण्ड अन्तर्गत कार्यरत ब्युरो सदस्य प्रभात चलाउने, जिल्ला समिति सदस्यहरू जमदेव जैसी, कमल बुढा, बाबुराम भुसाल र सुदिप वर्देवालाई पार्टीको साधारण सदस्यतासमेत नरहने गरी अनिश्चितकालका लागि निष्कासन गरेको छ ।
नेकपा मध्य केन्द्रीय कमाण्डका इन्चार्ज सुदर्शनले जनाएअनुसार उनीहरूमाथि पत्रकार संगठनका साथै पार्टी नीतिविरुद्ध अराजकता मच्चाएको, सूचना चुहाएको, पार्टी एवम् नेतृत्वका विरुद्ध सामाजिक संजालहरूमा भ्रामक समाचार दिएको र सार्वजनिक रुपमा जिम्मेवार साथीमाथि हातपात गरेको अभियोगका आधारमा कारवाही गरिएको हो ।
उता कारवाहीमा परेका व्यक्तिहरूले सार्वजनिक वक्तव्यमार्फत् आफूहरूमाथि लागेको आरोपको खण्डन गरेका छन् । प्रभात चलाउने, जन्मदेव जैसी, कमल बुढा, बाबुराम भुषाल र सुदिप बर्देवाद्वारा संयुक्त रूपमा जारी गरिएको विज्ञप्तिमा भनिएको छ- ‘विधि, पद्धति, अनुशासन नेताहरुमा लागु हुने कुरा हो कि होइन ? कुनै नेताका बारेमा आफूलाई लागेको कुरा आन्तरिक बैठकमा राख्न पाइन्छ कि पाइँदैन ? यो पार्टी र आन्दोलन विकास गर्न हामी कार्यकर्ताको कुनै योगदान छ कि छैन ? लामो समयदेखि आन्दोलनमा लागेका कार्यकर्ताको राजनीतिक जीवन नेतालाई रिस उठेका दिन एउटा विज्ञप्तिले सिध्याउन मिल्छ ?’
‘हामी हामीले बोकेको राजनीतिक आस्था र विचारमा सधै प्रतिबद्ध छौँ’ भन्दै सो विज्ञप्तिमा आफूहरूमाथि गरिएको व्यवहारका कारण आन्दोलनमा पर्ने असरका बारेमा चिन्ता लागेकोले यसबारे छिटोभन्दा छिटो पहल लिन पार्टी नेताहरूलाई अनुरोध गर्छौं भनिएको छ ।
