तस्करीमा परेका ४४ महिला UAE अध्यागमनद्वारा फिर्ता
काठमाडौं, मानव तस्करहरुले बिना भिसा संयुक्त अरब इमिरेट्स (युएई)को दुबई विमानस्थलमा पुर्याएका ४४ जना नेपाली महिलालाई फिर्ता पठाएको छ ।
मानव तस्करहरुले ती महिलालाई इराक, युएई, ओमन, कुवेत र सिरिया पठाउन तीन दिनअघि दुबई विमानस्थलभित्र ट्रान्जिटको रुपमा राखिएको थियो ।
लामो समयसम्म महिलाहरु विमानस्थलको ट्रान्जिटमा रहेको भेटिएपछि दुबई अध्यागमनले भिसा नभएको भन्दै दिल्ली पठाएको थियो । दिल्लीले नेपाल पठाइदिएको हो ।
दिल्लीबाट दुबईसम्म लैजाने एयर इन्डियाबाटै फिर्ता पठाइएको हो । ‘मानव तस्करहरुले दिल्लीबाट अनएराइभल भिसा पाउने भन्दै केन्याको टिकट देखाई पठाइएको थियो ।
दुबई पुगेपछि केन्याको टिकट रद्द गरी राखियो,’ दलालका गतिविधीलाई नजिकबाट नियालेका श्रोतले भने, ‘तर कसैको भिसा समयमा ननिस्किएकोले महिलाहरु थुप्रिंदै गए ।
दुबई अध्यागमनका अधिकारीहरुले सोधखोज गर्दा कसैको भिसा थिएन । कसैको भिसा भएपनि टिकट थिएन ।’ सरकारले घरेलु कामदारको रुपमा पठाउन रोके पनि भारत हुँदै खाडी देशमा लैजान मानवतस्करहरु सक्रिय छन् ।
ती महिलाकाे दिल्लीस्थित शिखा ट्राभल्सबाट टिकट जारी गरिएको थियो । कान्तिपुरमा समाचार छ । दुबईबाट मंगलबार १२ जना र बुधबार ३२ जना फिर्ता आएको अध्यागमन विभागका महानिर्देशक गंगाराम गिलालले बताए ।
फिर्ता पठाइएका महिलालाई सुरक्षीत आश्रयको लागि माइती नेपालमा पठाइएको छ । विभागले उनीहरुसँग छानविन गर्न थालेको छ । ‘हामी सबै एउटै दलालबाट गएको होइन ।
सबै विमानस्थलमै भेटिएको हो । हामी घरको काम गर्न लगिएको हो,’ एक महिलाले भनिन्, ‘दुई दिनसम्म दुबईमा विमास्थलमा बस्नुपर्यो ।’