चन्द्रयान–३ को सफलतामा भारतले ‘राष्ट्रिय अन्तरिक्ष दिवस’ मनाउने
भारत सरकारले अगस्त २३ मा ‘राष्ट्रिय अन्तरिक्ष दिवस’ मनाउने निर्णय गरेको छ । चन्द्रयान–३ सफलतापूर्वक चन्द्रमामा अवतरण गरेको खुसीयालीमा सरकारले सो दिनलाई उत्सवका रूपमा मनाउने निर्णय गरेको हो ।
मन्त्रिपरिषद् बैठकले भारतीय वैज्ञानिकहरूको उपलब्धिको प्रशंसा गर्दै इन्डियन स्पेस रिसर्च अर्गनाइजेसन (ईसरो) लाई बधाई समेत दिएको छ ।
‘यो हाम्रो स्पेस एजेन्सीको मात्र जीत होइन, यो भारतको प्रगति र वैश्विक क्षेत्रमा देशको सफलताको उज्ज्वल सङ्केत पनि हो,’ बैठकले भनेको छ ।
भारत चन्द्रमाको दक्षिण ध्रुवमा सफलतापूर्वक अवतरण गर्ने पहिलो राष्ट्र बनेको छ । हाल प्रज्ञान रोभरले चन्द्रमाको तथ्याङ्कहरू पृथ्वीमा पठाउने काम गरिरहेको छ ।
