नेकपाको विवाद बुझ्न काठमाडौं आइपुग्यो चिनियाँ टोली
नेपालको पछिल्लो राजनीतिक घटनाक्रमबारे बुझ्न उत्तरी छिमेकी देश चिनियाँ कम्युनिष्ट पार्टीका अन्तर्राष्ट्रिय विभागका उपमन्त्री गुओ येचौ काठमाडौँ आएका छन् ।
एयर चाइनाको चार्टर्ड विमानबाट चीनका उच्च अधिकारीको टोली आइतबार काठमाडौं आइपुगेको हो ।चिनियाँ कम्युनिष्ट पार्टी अन्तर्राष्ट्रिय विभागका उपमन्त्री गुओ येचौ नेतृत्वमा चार सदस्यीय टोली रहेका छन् ।
चिनियाँ टोलीको भ्रमणबारे विस्तृतमा जानकारी दिइएको छैन । यद्यपि चिनियाँ प्रतिनिधिमण्डल नेपालमा चार दिन रहनेछ र नेपाल बसाइको क्रममा राष्ट्रपति विद्यादेवी भण्डारी, प्रधानमन्त्री केपी शर्मा ओली, नेकपा अध्यक्षद्वय पुष्पकमल दाहाल प्रचण्ड र माधवकुमार नेपाललगायतसँग भेटवार्ता गर्ने छ ।
२०७४ सालमा पनि नेता गुओ फागुनमा नेपाल आएको र उनको भ्रमण लगत्तै नेपालका दुई कम्युनिष्ट पार्टी एमाले र र माओवादी केन्द्रबीच पार्टी एकीकरण सम्भव भएको थियो ।
यसअघि चिनियाँ राजदूत होउ यान्छीले राष्ट्रपति, प्रधानमन्त्रीका साथै नेकपाका शीर्ष नेताहरुलाई भेटेकी थिइन् ।भेटहरुमा उनले पार्टीको विवाद र राजनीतिक घटनाक्रम कसरी अगाडि बढ्छ भन्ने बढी चासो राखेकी थिइन् ।
