संयुक्त राष्ट्रसंघद्वारा विश्वमा भइरहेका सबै युद्ध रोक्न आह्वान
अहिले कोरोना भाइरस माहामारीकोरुप लिइ विश्वनै संकटमय अवस्थामा पुगेको बेला संयुक्त राष्ट्रसंघले विश्वमा भइरहेका सबै युद्ध रोक्न आह्वान गरेको छ ।
राष्ट्रसंघका महासचिव एन्टोनियो गुटरेजले कोरोना भाइरसको प्रकोपसँग जुध्न सबै किसिमका युद्ध रोक्न आह्वान गरेका छन् ।
युद्ध भैरहेका ठाउँमा स्वास्थ्य प्रणालीहरु अस्तव्यस्त हुने र त्यस्ता ठाउँमा कोरोनाको संक्रमणले खराब स्थिति ल्याउने चेतवानी दिँदै महासचिव गुटरेजले तत्काल युद्ध नरोके खराब स्थितिको सामना गर्नुपर्ने चेतवानीसमेत दिए ।
युद्धमा महिला र बालबालिका, अशक्त मानिस, सीमान्तकृत र विस्थापितहरू बढी समस्यामा पर्ने गरेको र कोरोना भाइरसबाट पनि यिनै वर्ग धेरै जोखिममा रहेको उनको भनाइ छ ।
अहिलेको अवस्था राष्ट्रसंघको ईतिहासकै खराब स्वास्थ्य संकट भएको बताउँदै अहिलेको जोखिमसँग लड्न तत्काल सबै युद्ध रोक्न आवश्यक भएको गुटरेजले बताए ।
उनले भाइरसको क्रोधले युद्धको मूर्खतालाई चित्रण गरेको उल्लेख गर्दै यो समय सशस्त्र संघर्षलाई लकडाउनमा राखेर मानवीय जीवनको साँचो लडाइँमा ध्यान केन्दृत गर्ने समय भएको बताए ।
उनले विश्वका नेताहरुलाई तत्काल संयोजित प्रतिक्रिया देखाउन एकताबद्ध हुन आह्वान पनि गरेका छन् ।
