अख्तियारका पदाधिकारीलाई बयानका लागि बोलाइने
काठमाडाैँ, ६ फागुन । अख्तियार दुरुपयोग अनुसन्धान आयोगले त्रिवि सेवा आयोगद्वारा सञ्चालित परीक्षामा अनियमितता भएको सम्बन्धमा छानबिन अगाडि बढाउने निर्णय गरेको छ ।
अख्तियारका आयुक्तद्वय नवीनकुमार घिमिरे र राजनारायण पाठक र महाशाखाका अधिकारीसहित बिहीबार बसेको बैठकले सेवा आयोगले लिएका परीक्षाको विस्तृत र गहन छानबिन गर्ने निर्णय गरेको हो ।
ख्तियारले बुधबार कीर्तिपुरस्थित सेवा आयोगको कार्यालयमा छापा मारी विभिन्न परीक्षासम्बन्धी सामग्री तथा उत्तरपुस्तिका नियन्त्रणमा लिएको थियो । अख्तियारले छानबिनका क्रममा आवश्यक परे त्रिवि सेवा आयोगका अध्यक्ष चैतन्य शर्मालगायतका पदाधिकारीलाई समेत बोलाउन सकिने जनाएको छ ।
२२ विषयको परीक्षाका उत्तरपुस्तिका जफत
अख्तियार टोलीले विभिन्न २२ विषयमा भएको परीक्षाको उत्तरपुस्तिकालगायतका सबै फाइल जफत गरी छानबिन थालेको छ । जफत गरिएका उत्तरपुस्तिकामा ग्रामीण विकास, कानुन, गणित, स्वास्थ्य तथा शारीरिक शिक्षालगायतका छन् ।
अख्तियारका प्रवक्ता सहसचिव जीवराज कोइरालाले त्रिवि सेवा आयोगबाट लिइएको उपप्राध्यापकका परीक्षासम्बन्धी विभिन्न फाइलको गम्भीरतापूर्वक छानबिन थालिएको जानकारी दिए ।
आयोगले अनुसन्धान अधिकृत नै तोकेर अनुसन्धानलाई अघि बढाएको छ । एक महिनाभित्रै सबै अनुसन्धान टुंगोमा पु¥याउने गरी अघि बढ्ने निर्णय भएको ती अनुसन्धान अधिकृतले जानकारी दिए ।