रमेश महतोको सम्झनामा आज मधेश प्रदेशमा मनाइयो बलिदानी दिवस, तर अन्य प्रदेशमा मौनता
मधेशी आन्दोलनको प्रथम सहिद रमेश महतोको सम्झनामा आज मधेश प्रदेशमा बलिदानी दिवस मनाइएको छ ।
तर अन्य प्रदेशमा खासै चर्चासम्म पनि भएको देखिएन । जवकी कोशी प्रदेश, लुम्बिनी प्रदेश र बागमती प्रदेशमा समेत मधेशी समुदायको उल्लेख्य बसोवास रहेका छन् ।
समावेशिता र संघीयता मधेशी आन्दोलनकै उपज मानिन्छ भने लोकसेवा आयोग समेत विभिन्न निकायमा रहेको समावेशी क्लष्टरको व्यवस्था पनि सोही आन्दोलनबाट भएको हो ।
नागरिक टाइम्सका सम्पादक तथा अधिकारकर्मी वीरेन्द्र केएमले बलिदानी दिवस मधेशी दल केन्द्रित निजि दिवस जस्तै बन्न पुगेको बताएका छन् ।
‘मधेशीको पहिचान समेत सोही आन्दोलनबाट स्थापति भएको थियो तर आज मधेशीहरुले उक्त कुरा बिर्सिसकेका छन्’ केएमले भने – ‘मधेशी कोटा पाउन मधेशीहरु जहाँपनि पुग्छन् तर आजको बलिदानी दिवस मनाउन लाज मान्छन् ।’
उनले भने – ‘बलिदानी दिवस बनाउनुपर्ने कर्तब्य मात्र मधेशकेन्द्रित दलको होइन, सबै मधेशीले यो दिवस बनाउनु पर्छ, नेपाल सरकारले नै आजको दिन बिदा दिनुपथ्र्यो ।’
उता, मधेश प्रदेशमा आज बलिदानी दिवस मनाइएको छ । योसँगै प्रथम मधेशी आन्दोलनको १७ वर्ष पूरा भएको छ ।
२०६३ सालको माघ ५ गते हालको मधेश प्रदेश स्थित सिरहाको लहानमा आन्दोलनकारी रमेश महतो मृृत्युपछि प्रथम मधेशी आन्दोलनको सुरुवात भएको थियो ।
सहिद रमेश महतोको सहादत तथा आन्दोलनको सुरुवात भएको सम्झनामा माघ ५ गतेलाई मधेश प्रदेश सरकार र मधेश केन्द्रीत दलहरुले प्रत्येक वर्ष बलिदानी दिवसको रुपमा मनाउँदै आएका छन् ।
२०६३ सालमा तत्कालीन मधेसी जनअधिकार फोरम नेपालका संयोजक उपेन्द्र यादवलगायतका नेताहरुले काठमाण्डौमा अन्तरिम संविधानको प्रतिलिपि जलाएपछि मधेशी अधिकार केन्द्रित आन्दोलनको थालनी भएको थियो ।
माइतीघर मण्डलाबाट नेता यादव सहितका नेताहरुलाई प्रहरीले पक्राउ गरेपछि तराई मधेशक्षेत्रमा आन्दोलन चर्किएको थियो ।
आन्दोलनका क्रममा लहानस्थित लिटिल स्टार बोर्डिङ स्कुलमा अध्यनरत सिरहा मझौराका विद्यार्थी रमेश महतो प्रहरीको गोलीबाट मारिएपछि उनलाई मधेशी आन्दोलनको पहिलो सहिद घोषणा गरिएको थियो ।
बलिदानी दिवसको अवसरमा मधेश प्रदेश सरकारले आज सार्वजनिक बिदा दिएको छ ।
