महालेखाले प्रतिवदेनमा लेखेको ‘सुनको जलहरी’को कुरा संसदको रेकर्डबाट हटाइएकोमा खतिवडाको आपत्ति
नेपाली कांग्रेसका सांसद रामहरि खतिवडाले पशुपतिनाथको मन्दिरमा जलहरी राख्दा सुन हराएको महालेखाको प्रतिवेदनको कुरा संसद्को रेकर्डबाट हटाइएकोमा आपत्ति जनाएका छन् ।
शुक्रवार प्रतिनिधिसभाको बैठकमा बोल्दै सांसद खतिवडाले संसद्लाई हल्का रूपमा प्रस्तुत गर्न खोजिएको भन्दै संसदमा छलफल हुनुपर्ने विषय रेकर्डबाट हटाउने परम्परा अन्त्य गर्न माग गरे ।
‘कसैको सत्ता आवेग, सत्ता पाउने वा नपाउने आवेगको केन्द्र संसद् नबनोस् । संसदमा छलफल हुने विषय वस्तु रेकर्डबाट हटाउने परम्परा अन्त्य होस् । हामी संसद्लाई सार्वभौम सत्ता सम्पन्न बनाउन चाहन्छौँ । महालेखाको प्रतिवेदन ५१६ मा सुनको जलहरी निर्माण प्रक्रियामा १०७ किलो सुन ९२४ ग्राम प्रयोग गर्ने उल्लेख गरिएको हुन्छ त्यसमध्ये ९६ किलो ८ सय २२ ग्राम मात्र प्रयोग गरिएको र १० किलो सुन ९ सय ७६ ग्राम सुन बेपत्ता भएको महालेखाको प्रतिवेदनमा उल्लेख छ,’ उनले भने- ‘ त्यो कुरा संसदमा बोल्न महालेखाको प्रतिवेदन हामीलाई दिएको हो । त्यो कुरा बोल्दाखेरि संसद्को रेकर्डबाट हटाउने कुराको म विरुद्धमा छु । यी कुरा उठाउँदा ३ चोटी, ४ चोटी संसदबाट डिलिट हुन्छ भने पनि जनताको मनबाट डिलिट हुन सक्दैन । यो विषय संसदमा छलफल हुनुपर्छ ।’
