आर्थिक विकास र समृद्धिका लागि सरकार स्थिर हुनुपर्छ : उपेन्द्र यादव
जनता समाजवादी पार्टी नेपाल (जसपा)का अध्यक्ष उपेन्द्र यादवले आर्थिक विकास र समृद्धिका लागि सरकार स्थिर हुनुपर्नेमा जोड दिएका छन् ।
मंगलबार प्रतिनिधिसभाको बैठकपछि सञ्चारकर्मीहरूलाई प्रतिक्रिया दिँदै अध्यक्ष यादवले सरकारको स्थिरता समग्र लोकतन्त्रकै विकासमा अत्यन्त महत्त्वपूर्ण रहेको धारणा राखे ।
संसदका लागि संसदीय समिति महत्त्वपूर्ण रहेको बताउँदै उनले स्थायित्वका लागि समितिहरुले पनि काम गर्नुपर्नेमा जोड दिए । अस्थिरताले कसैलाई हित नगर्ने भन्दै यादवले सोही कारण जनतामा वितृष्णा जाग्न सक्ने भएकाले सबैपक्ष गम्भीर बन्नुपर्नेमा जोड दिए ।
उनले सरकारको स्थायित्वका लागि दलहरुको बीचमा छलफल गरेर अगाडि बढ्नुपर्ने पनि बताए । २–३ महिनामा सरकार परिवर्तन भइरह्यो भने देशको हितमा नहुने भएकाले दलहरुबीच वृहत समझदारी जरुरी रहेको यादवको भनाइ थियो ।
अर्को प्रसंगमा यादवले पार्टीबाट सरकारमा पठाउने व्यक्तिको बारेमा छलफल भइनसकेको बताए ।
