भरतपुरमा दाहाल र अधिकारी विजयी, वीरगन्जमा सिंह र आलम विजयी
भरतपुर महानगर पालिका र वीरगन्ज महानगर पालिकाको मतपरिणम सार्वजनिक भएको छ । बागमती प्रदेशको चितवन स्थित भरतपुरको मेयरमा नेकपा माओवादी केन्द्रकी रेनु दाहाल विजयी भएकी छिन् । भने उमपेयरमा पनि सत्तारूढ गठबन्धनबाट नेपाली कांग्रेसका चित्रसेन अधिकारी विजयी भएका छन् ।
त्यस्तै मधेस प्रदेशको एक मात्र महानगर वीरगन्ज महानगरपालिकामा ५ दलीय गठबन्धनका उम्मेदवार मेयर र उपमेयर विजयी भएका छन् ।
मंगलबार बिहान सम्पन्न मतगणना अनुसार मेयरमा जनता समाजवादी पार्टीका राजेशमान सिंह र उपमेयरमा कांग्रेसका इम्तियाज आलम विजयी भएका हुन् ।
भरतपुरमा एमाले उम्मेदवार विजय सुवेदीलाई १२ हजारभन्दा बढी मतले हराउँदै दाहाल भरतपुरको मेयरमा दोस्रो कार्यकालका लागि निर्वाचित भएकी हुन् ।
सत्तारूढ गठबन्धनबाट माओवादी केन्द्रकी उम्मेदवार रेनु दाहाल १२ हजार ४ सय ४९ मतान्तरले विजयी भएकी हुन् ।
भरतपुरको मुख्य निर्वाचन अधिकृतको कार्यालयले औपचारिक रूपमा निर्वाचन परिणाम भने अझै सार्वजनिक गरेको छैन ।
प्राप्त विवरणअनुसार दाहालले ५२ हजार ३० मत ल्याउँदा उनका निकटतम प्रतिद्वन्द्वी एमालेका सुवेदीले ३९ हजार ५ सय ८१ मत ल्याए ।
अधिकारीले ५२ हजार ८ सय ३ मत ल्याउँदा उनका निकटतम प्रतिद्वन्द्वी राप्रपाकी हिमला गुरूङले ३० हजार ६ सय १२ मत ल्याइन् ।
हिमलालाई एमालेको समर्थन थियो । मेयर पदका स्वतन्त्र उम्मेदवार जगन्नाथ पौडेलको १४ हजार ७ सय २८ मत आएको छ ।
यसैगरी विरजञ्जका मुख्य निर्वाचन अधिकृत धर्मराज पौडेलका अनुसार मेयरमा सिंहले ४६ हजार २ सय १५ मत ल्याएका छन् ।
उनका निकटतम प्रतिद्वन्द्वी एमालेका विजय सरावगीले २३ हजार ६ सय ७१ मत पाएका छन् ।
निवर्तमान मेयरसमेत रहेका सरवागीलाई सिंहले २२ हजार ५ सय ४४ मतले पराजित गरेका हुन् ।
मेयरका अर्को उम्मेदवार राप्रपाका गिरिश गिरीले ३ हजार ३ सय १३ मत पाएका छन् ।
उपमेयरमा विजयी भएका कांग्रेसका इम्तियाज आलमले ३० हजार ७८ मत ल्याएका छन् भने उनका निकटतम प्रतिद्वन्द्वी लोकतान्त्रिक समाजवादी पार्टी (लोसपा) का पुरुषोत्तमलाल झाले ९ हजार ५ सय ६८ मत पाएका छन् ।
आलमले झालाई २० हजार ५ सय १० मतले पराजित गरेका हुन् । उपमेयरमा विजयी भएका आलम कांग्रेस पर्साका जिल्ला सचिव हुन् । मेयर र उपमेयरमा एमाले र लोसपाले गठबन्धन गरेको थियो ।
