प्रधानमन्त्री देउवाद्वारा चोभार सुक्खा बन्दरगाह उद्घाटन
प्रधानमन्त्री शेरबहादुर देउवाले औपचारिक रुपमा चोभार बन्दरगाह सञ्चालनको उद्घाटन गरेका छन् । प्रधानमन्त्री देउवाले मंगलबार चोभार सुक्खा बन्दरगाह उद्घाटन गरेसँगै सञ्चालनमा आएको छ ।
वीरगन्जबाट आएको मालवाहक ट्रकलाई प्रवेश गराएर बन्दरगाह सञ्चालनको आरम्भ गरिएको छ ।अब व्यवसायीले आयात गरेका वस्तु बन्दरगाह भन्सार कार्यालयबाट जाँच पास गराउन पाउने भएका छन् ।
सीमास्थित भन्सार कार्यालयबाट आन्तरिक परिवहन गरी अब सिधै चोभार सुख्खा बन्दरगाह भन्सार कार्यालयमा जाँच पास गर्न सकिनेछ ।
सीमाबाट बन्दरगाह भन्सारसम्म महानिर्देशकले तोके बमोजिमको सडक मार्गबाट सामान लैजान आन्तरिक परिवहनको सुविधा दिइनेछ ।
सुविधा लिन चाहने पैठारीकर्ताले प्रणालीबाटै फारम मुद्रण गरी सीमास्थित भन्सार कार्यालयका अधिकृतसमक्ष निवेदन दिनुपर्नेछ ।
अब मालवाहक सबै सवारीसाधन बन्दरगाहभित्र आउँछन्, दर्ता गर्छन्, पार्किङमा जान्छन्, आवश्यक परे तिनले गोदामसमेत प्रयोग गर्छन् ।
भन्सार प्रक्रिया सुरु हुन्छ, सामानको जाँच पास हुन्छ । भन्सार क्लियर भएपछि मालवाहक गाडी बन्दरगाह परिसरबाट बाहिर निस्कन्छन् । भन्सार प्रयोजनका लागि सुव्यवस्थित हिसाबले प्रक्रिया पूरा गर्न बन्दरगाह निर्माण गरिएको हो ।बन्दरगाह नहुँदा सडक-सडकबाटै भन्सार जाँच पास हुने गरेको थियो ।
