प्रधानमन्त्री देउवा बनारस जादैँ, आजै काठमाडौं फर्किने
छिमेकी मुलुक भारत भ्रमणमा रहेका प्रधानमन्त्री शेरबहादुर देउवा आज भारतको उत्तर प्रदेश बनारस जादैँ छन् । प्रधानमन्त्री देउवा आज काठमाडौं फर्किनु अघि उनी आज उत्तर प्रदेशको बनारस जाने छन् ।
परराष्ट्र मन्त्रालयका अनुसार प्रधानमन्त्री देउवा आज बिहान नौ बजे नयाँ दिल्लीबाट बनारस प्रस्थान गरेका छन् । उत्तर प्रदेशका मुख्यमन्त्री योगी आदित्यनाथले प्रधानमन्त्री देउवालाई स्वागत गर्नेछन् । बनारसमा प्रधानमन्त्री देउवाले विश्वनाथ र पशुपतिनाथ मन्दिरको दर्शन गर्ने कार्यक्रम छ ।
प्रधानमन्त्री देउवा बनारसबाट चार बजे नयाँ दिल्ली आइपुग्ने र सवा चार बजे काठमाडौँका लागि प्रस्थान गर्ने कार्यक्रम छ ।
भारतको औपचारिक भ्रमण गर्न प्रधानमन्त्री देउवा गत शुक्रबार नयाँ दिल्ली गएका थिए । शनिवार देउवाले समकक्षी मोदीसँग भेटवार्ता गरेका थिए । भेटको क्रममा देउवाले सीमा समस्या समाधानका लागि मोदीलाई अनुरोध गरेका थिए ।
साथै दुवै देशका प्रधानमन्त्रीले जनकपुर–जयनगर रेल सेवा र सोलु कोरिडोर संयुक्त रूपमा भर्चुअल माध्यमबाट उद्घाटन गरेका थिए ।
