आज पनि कांग्रेसको केन्द्रीय समिति बैठक, चुनावी गठबन्धनबारे ठोस छलफल हुने
स्थानीय निर्वाचन केन्द्रित छलफल गर्न नेपाली कांग्रेसको जारी केन्द्रीय समिति बैठकमा आइतबार पनि बस्ने भएको छ ।
पार्टी केन्द्रीय कार्यालय सानेपामा बिहान ११ बजेपछि बस्ने बैठकमा गठबन्धन केन्द्रीय तहबाटै कि स्थानीय तहको आवश्यकता अनुसार गर्ने भन्ने विषयमा छलफल हुने भएको हो ।
बैठकमा निर्वाचन घोषणापत्रबारे पनि छलफल हुने भएको सह महामन्त्री भीष्मराज आङ्देम्बेले जानकारी दिएका छन् ।बैठकको पहिलो दिन शुक्रबार २२ जना नेताले धारणा राखेका थिए ।
अधिकांशले गठबन्धन आवश्यक रहेको जोड दिँदा केहीले गठबन्धनबिना निर्वाचनमा जानुपर्ने बताएका थिए ।गठबन्धन आवश्यक रहेको भन्ने नेताहरू प्रधानमन्त्रीसमेत रहेका पार्टी सभापति शेरबहादुर देउवानिकट हुन् ।
गठबन्धनबिना निर्वाचनमा जानुपर्ने मत राख्ने नेताहरू पार्टीका अर्का नेता डा. शेखर कोइराला पक्षीय हुन् ।
