एमसीसीलाई लिएर फेसबुकमा अत्यन्तै आपत्तिजनक कुरा लेख्नेलाई स्पष्टीकरण सोध्ने नेपालको चेतावनी
नेकपा एकीकृत समाजवादीका अध्यक्ष माधवकुमार नेपालले एमसीसीको सन्र्दभमा फेसबुकमा अत्यन्तै गम्भीर र आपत्तिजनक लेख्ने नेतालाई स्पष्टीकरण सोध्ने चेतावनी दिएका छन् ।
आजबाट सुरु भएको नेकपा एसको कन्द्रीय कमिटी बैठकलाई सम्बोधन गर्दै अध्यक्ष नेपालले कुनै पनि नेताको नाम नलिई गल्ती स्वीकार नगरे स्पष्टीकरण सोधिने बताए ।
नेपालले भने, ‘एमसीसीमा अत्यन्तै गम्भीर कुरा फेसबुकमा लेख्नुभएको छ । गल्ती स्वीकार गर्नुहोस् । स्पष्टीकरण सोध्नुपर्ने नहोस् । ती कुराहरू आपत्तिजनक छन्, पार्टीले सहन सक्दैन । बहुमतको निर्णय पार्टीको निर्णय हुन्छ ।’
यसअघि पोलिटब्यूरो बैठकमा पनि अध्यक्ष नेपालले सम्मानित नेता झालनाथ खनालको आलोचना गरेका थिए । एमसीसी पास नगरेको भए सभामुख हटाउने, आफूसहित १४ सांसदको पद खारेज गर्ने र नेकपा एसको वैधानिकता नै समाप्त पारेर आफूहरूलाई घर न घाटको बनाउने षड्यन्त्र भएको नेपालले बैठकमा बताए ।
अध्यक्ष नेपालले आगामी निर्वाचनमा अरू दलसँग तालमेल गरेर एमालेलाई पराजित गर्ने बताए । नेपालले केपी ओलीले बिनाशर्त एमसीसी पास गरेर आफूहरूलाई समाप्त पार्ने भएपछि त्यसमा संशोधन गरेर भए पनि पारित गरेर गठबन्धन जोगाइएको बैठकमा बताए ।