सरकारले स्थानीय चुनावको मिति घोषणा नगरे पनि निर्वाचन आयोग जुट्यो तयारीमा
निर्वाचन आयोग स्थानीय तहको चुनावको मिति घोषणा नगरे पनि चुनावको तयारीमा जुटेको छ । सरकारले स्थानीय तहको चुनावको मिति घोषणा नगरे पनि आयोग भने चुनावको तयारीमा जुटेको हो ।
गएको मगलबार प्रधानमन्त्री शेरबहादुर देउवा र आयोगका पदाधिकारीबीच आउँदो जेठ ५ गते सम्म स्थानीय चुनाव सम्पन्न गर्ने समझदारी भएको थियो ।तर सरकारले औपचारिक रुपमा मिति घोषणा गरिसकेको छैन ।
केही दिनमै सरकारले मिति घोषणा गर्ने विश्वासका साथ चुनावको तयारी भइरहेको निर्वाचन आयोगले जनाएको छ ।आयोगका प्रवक्ता शालिग्राम शर्मा पौडेलले आयोगको तर्फबाट गर्नुपर्ने तयारी भइरहेको जानकारी दिए । तर, कतिपय काम मिति घोषणा भएपछि सुरु हुने उनले बताए ।
स्थानीय तहको चुनावलाई लक्षित गरी आयोगले मतदाता सङ्कलन, मतदानस्थलहरुको पुनरावलोकन र निर्धारण, दातृ निकायसँग समन्वय गर्ने तथा अरु आवश्यक पूर्व तयारीका कामहरु निरन्तर गरिरहेको प्रवक्ता पौडलले जानकारी दिए ।
चुनावको मिति घोषणा नहुँदासम्म मतदाता नामावली सङ्कलनको काम भइरहने पनि उनले बताए । २०७४ वैशाख ३१ गते, असार १४ गते र असोज २ गते गरी तीन चरणमा भएको स्थानीय तहको चुनावबाट निर्वाचित पदाधिकारीहरुको पदावधि आउँदो जेठ ५ गते सकिँदै छ ।
