बजेट खर्च बढाउने गरी काम गर्न कर्मचारीहरूलाई मुख्यमन्त्री शाहीको निर्देशन
नवनियुक्त कर्णाली प्रदेशका मुख्यमन्त्री जीवनबहादुर शाहीले बजेट खर्च बढाउने गरी काम गर्न कर्मचारीहरूलाई निर्देशन दिएका छन् ।
मुख्यमन्त्री तथा मन्त्रिपरिषदको कार्यालयमा बुधवार पहिलो चौमासिकमा कर्णालीको बजेट खर्च ३.७५ प्रतिशतमात्रै रहेको भन्दै मुख्यमन्त्री शाहीले बजेट खर्च बढाउने गरी काम गर्न निर्देशन दिएका हुन् ।
बुधवार प्रदेश प्रमुख सचिव, मन्त्रालयका सचिवहरू र कर्मचारीसँगको छलफलमा उनले बजेट कार्यान्वयन प्रभावकारी रूपमा गर्न निर्देशन दिएका हुन् ।
मुख्यमन्त्री शाहीले जनतालाई परिवर्तनको अनुभूति दिने गरी काम गर्न निर्देशन दिँदै ठुलो भूगोल र कम जनसङ्ख्या भएको कर्णाली विकासका दृष्टिकोणले धेरै पछाडि रहेकाले अरू प्रदेश हिँड्दा कर्णाली दौडनुपर्ने अवस्था रहेकोसमेत बताए ।
