नेपालसहित १४ सांसदलाई कारबाही गर्न एमालेद्वारा सभामुखको ध्यानाकर्षण
माधव नेपालसहित १४ सांसदलाई कारबाही गर्न नेकपा एमालेले सभामुखको ध्यानाकर्षण गराएको छ ।
नेकपा एमाले (समाजवादी)पार्टी दर्ताका लागि निर्वाचन आयोगमा निवेदन दिएका माधव नेपालसहित १४ जना सांसदहरुलाई तत्काल कारबाही गर्न नेकपा एमालेले सभामुख अग्नि प्रसाद सापकोटालाई ध्यानाकर्षण गराएको हो ।
सभामुख अग्निसापकोटालाई बिहीबार बिहान भेटेर एमाले संसदीय दलका प्रमुख सचेतक विशाल भट्टराई नेतृत्वको टोलीले कारबाहीका लागि ध्यानाकर्षण गराएको हो ।
एमाले स्थायी कमिटी बैठकले १ भदौमा माधव नेपालसहित १४ जना सांसदहरुलाई पार्टीबाट निष्कासन गर्ने निर्णय गरेको थियो । पार्टीले कारबाही गरेको जानकारी एमालेले संसद सचिवालयमा गराइसकेको छ ।
एमालेले कारबाही गरेको निवेदन पठाएपछि माधव नेपाल पक्षका सांसदहरुले यसअघि नै संसद सचिवालयमा कारबाही नगर्न भन्दै निवेदन दिइसकेका छन् ।
एमालेले कारबाही गरेका सांसदसहित नेताहरुले बिहीबार नै माधव नेपालको नेतृत्वमा निर्वाचन आयोगमा नेकपा एमाले (समाजवादी) दार्ताका लागि निवेदन दिइसकेका छन् ।
