पार्टी एकताका लागि अन्तिमसम्म प्रयत्न जारी राख्ने ओली पक्षको निर्णय
नेकपा एमाले पार्टी एकताका लागि अन्तिमसम्म प्रयत्न जारी राख्ने एमालेको ओली पक्षले निर्णय गरेको छ ।
अध्यक्ष केपी शर्मा ओली पक्षीय नेताहरू मात्र रहेको स्थायी कमिटीको मंगलबार बसेको बैठकले एकताका निम्ति अन्तिमसम्म प्रयत्न जारी राख्ने निर्णय गरेको प्रवक्ता प्रदीप ज्ञवालीले जानकारी दिएका छन् ।
त्यस्तै एमाले बैठकमा प्रतिनिधि सभा विघटनपछिका राजनीतिक घटनाक्रम र सर्वोच्च अदालतमा विचाराधीन मुद्दा प्रभावित गर्नेगरी भइरहेका बहसमाथि समिक्षा भएको छ ।
साथै बजेट र लुम्बिनी प्रदेशमा भएको राष्ट्रिय सभा उप निर्वाचनको समेत बैठकमा समिक्षा भएको छ ।बैठकमा स्पष्टिकरण सोधेका १२ जना नेतालाई कारवाहीबारे बैठकको एजेण्डा नै नभएको प्रवक्ता ज्ञवालीले बताए । उनले एमाले वार्ताका लागि गठित कार्यदल अस्तित्वमा नरहेको भन्दै आवश्यक परे कार्यदललाई पुनर्गठन गर्न सकिने जानकारी दिए ।
नेकपा एमालेमा पार्टी एकता हुने सम्भावना एकदमै कम रहेको छ । प्रधानमन्त्री केपी शर्मा ओलीले दोस्रो पटक पनि संसद् विघटन गरेपछि तत्कालीन एमालेका नेता माधव नेपाल पक्षले विरोध जनाउँदै विपक्षि गठबन्धनसँग हातेमालो गरीरहेका छन् । उनले नयाँ पार्टी दर्ता समेत गर्ने तयारीमा रहेका छन् ।
