बाँकेमा पुनः थपियो एक साताका लागि निषेधाज्ञा
लुम्बिनी प्रदेश अन्तर्गत रहेको बाँके जिल्लामा जारी निषेधाज्ञा एक साताका लागि पुनः थप गरिएको छ । प्रमुख जिल्ला अधिकारी शिवराम गेलालको अध्यक्षतामा बसेको सुरक्षा समितिको बैठकले निषेधाज्ञालाई सात दिन निरन्तरता दिने निर्णय गरेको हो ।
कोरोना संक्रमण नियन्त्रणमा आइनसकेकाले जेठ १७ गते राति १२ बजेसम्म निषेधाज्ञा जारी रहने प्रमुख जिल्ला अधिकारी गेलालले बताएका छन ।
कोरोना जोखिमको अवस्था अझै कायम रहेकाले निषेधाज्ञालाई निरन्तरता दिइएको उनले जानकारी दिए ।
बाँकेमा पाँचौं पटक निषेधाज्ञा बढाइएको हो । जिल्लामा गत वैशाख १३ गतेदेखि निषेधाज्ञा कायम छ । नेपालगञ्ज क्षेत्रमा वैशाख ९ गतेदेखि नै निषेधाज्ञा लगाइएको थियो ।
बाँकेमा पछिल्ला दिनमा मृत्यु र संक्रमणदरमा कमी आएको छ ।
