अक्सिजन प्लान्ट र पाइपलाइन जडानका लागि तीन अस्पताललाई पौने ६ करोड स्वीकृत
अक्सिजन प्लान्ट र पाइपलाइन जडानका लागि तीन अस्पताललाई पौने ६ करोड रुपैयाँ उपलब्ध गराउने निर्णय स्वीकृत गरेको अर्थमन्त्री विष्णुप्रसाद पौडेलले बताएका छन् ।
शुक्रवार पदबहाली पछि कुरा गर्दै नवनियुक्त अर्थमन्त्री पौडेलले डडेलधुरा अस्पताल, पाटन स्वास्थ्य विज्ञान प्रतिष्ठान र भेरी अस्पताल नेपालगन्जका लागि ५ करोड ८३ लाख २४ हजार रुपैयाँ उपलब्ध गराउने निर्णय स्वीकृत गरिएको बताए।
अर्थमन्त्री पौडेलले बजेट तयारी अन्तिम चरणमा रहेको र कोभिड महामारीले प्रभावित अर्थतन्त्रलाई पुनरुत्थान र गतिशील बनाउने संकल्पकासाथ बजेट ल्याउन लागिएको बताए।
आगामी वर्षको वजेट कोभिड-१९ लाई सामना गर्ने गरी ल्याइने उनको भनाइ छ । कोभिड रोकथाम तथा नियन्त्रण गर्न सम्पूर्ण शक्ति, स्रोत र सामर्थ्य परिचालित गर्ने र यसलाई थप सघन एवं प्रभावकारी बनाइने उनको भनाइ छ ।
