पेचिलो बन्यो ‘नेकपा विवाद’ सूर्य चिन्ह ‘फ्रिज’ बारे निर्वाचन आयोगमा छलफल
कानून अभावमा सत्तारुढ दल नेपाल कम्युनिस्ट पार्टी (नेकपा) को विवाद पेचिलो बनेको छ । कनून अभावका कारण निर्वाचन आयोगलाई उक्त विवादको गाठो फूकाउन निकै कठिन भएको देखिएको छ ।
निर्वाचन आयोगमा नेकपा ओली समूह र प्रचण्ड–माधव दुवै पक्षले आधिकारिकता दावी गरेपछि आयोग सकसमा परेको हो । सामान्यतया दल ऐनअनुसार बहुमत पक्षलाई आधिकारिकता दिनुपर्ने भएपनि संसद बिघठन घटनाका कारण आयोगलाई विावाद फूकाउन निकै गाह«ो परेको हो ।
कानूनमा दलको केन्द्रिय समिति र संसदीय समति भन्ने शव्द उल्लेख भएपनि संसद नभएका बेलामा के गर्ने भन्नै छैन ।
सरकारले निर्वाचन घोषणा गरिसकेको र निर्वाचन प्रक्रिया तीव्र पार्न दवाव दिइरहेको अवस्थामा आयोगले दल विवादबारे निर्णय गर्न नसक्दा आयोगको आलोचना समेत हुँदै आएको छ ।
यसअघि प्रधानमन्त्री केपी शर्मा ओली स्वयं आयोगको केन्द्रीय कार्यालय पुगेर निर्वाचन प्रक्रिया तीव्र पार्न भनेका थिए । प्रधानमन्त्रीले सुझावका रुपमा आयोगलाई यस्तो भनेपनि निर्वाचन चिन्ह र नेकपाको वैधानिकता कसलाई र कुन आधारमा दिने भन्नेमा आयोगले निर्णय गर्न सकेको छैन ।
सरकारको निर्वाचन मिति घोषणाअनुसार अब अढाई महिना पनि समय छैन । यस्तो बेलामा आयोगलाई निर्वाचन आचारसंहिता जारी गर्न सरकारी पक्षले दवाव दिइरहेको छ ।
आयोग उच्च स्रोत भन्छ, ‘नेकपाको विवाद निकै जेलिएको छ । निर्वाचन आचारसंहिता र दलको आधिकारिकताबारे आयोगले एकैपटक निर्णय गर्छ ।’ स्रोतका अनुसार यी विषयमा आयोगले विभिन्न कोणबाट छलफल गरिरहेको छ ।
जसमा नेकपामा विवादको जड रहेको सूर्य चिन्ह फ्रिज गर्ने विषयमा समेत छलफल भइरहेको छ । ‘सूर्य चिन्हबारे विभिन्न कोणबाट छलफल भइरहेको छ ।
त्यो भनेको सूर्य चिन्ह फ्रिज गर्ने र दुवै पक्षलाई अर्को चुनाव चिन्ह दिने पनि एक विकल्पका रुपमा छलफल भएको छ । यो लगायत कोणबाट पनि छलफल भइरहेकाले यसै हुन्छ भन्न सकिन्न्’, आयोग उच्च स्रोतले भन्यो, ‘अबको एक दुई दिनभित्रै आयोग टुंगोमा पुग्छ ।’
प्रधानमन्त्री केपी शर्मा ओलीले गत पुस ५ गते प्रतिनिधिसभा विघटन गर्दै आगामी वैशाख १७ र २७ गते दुई चरणमा निर्वाचनको मिति घोषणा गरेपछि आयोग पार्टीको विवाद टुङ्ग्याउने भन्दा पनि निर्वाचनको तयारीमा केन्द्रीत हुँदै आएको हो ।
दुई–तिन दिन भित्रमा आचारसंहिता जारी गर्ने गरी तयारी भइरहेको आयोगका प्रवक्ता राजकुमार श्रेष्ठले पनि बताए । राजनीतिक दलहरुसँगको छलफलबाट आएको सुझावका आधारमा नै आयोगले निर्वाचन आचार संहिता जारी गर्न लागेको प्रवक्ता श्रेष्ठले बताए ।
उनले भने–‘एक–दुई दिनमा आयोगले आचार संहिता स्वीकृत गर्छ, त्यसपछि जारी गर्छ । राजनीतिक दलहरुसँग भएको छलफल र सुझावका आधारमा आचारसंहिता जारी हुन्छ ।’