न्यायाधीश हरिकृष्ण कार्की संवैधानिक इजलासमा नबस्ने
संसद् विघटनको मुद्दाबारे सुनुवाई गरिरहको संवैधानिक इजलासमा न्यायाधीश हरिकृष्ण कार्कीले नबस्ने घोषणा गरेका छन् ।
विपक्षीहरुको लिखित जवाफ आएपछि बुधबार सुरु भएको सुनुवाईका क्रममा वरिष्ठ अधिवक्ता शम्भु थापा र दिनेश त्रिपाठीले न्यायाधीश कार्कीको सहभागितामा प्रश्न उठाए ।
वरिष्ठ अधिवक्ता थापाले प्रधानन्यायाधीशलाई प्रश्न गरेका थिए, ‘रोष्टरमा १४ जना न्यायाधीश छन् । न्यायाधीश अभाव नहुँदा पनि महान्याधिवक्ता भइसकको मान्छेलाई नै किन छान्नुभयो ?’
प्रतिनिधिसभा विघटनविरुद्ध परेका रिटहरुको सुनुवाईका लागि प्रधानन्यायाधीश चोलेन्द्रशम्शेर जबराले आफ्नो नेतृत्वको संवैधानिक इजलासमा न्यायाधीश कार्कीसहित विश्वम्भरप्रसाद श्रेष्ठ, अनिलकुमार सिन्हा र तेजबहादुर केसी तोकेका थिए ।
यसले राम्रो सन्देश नगएको भन्दै उनले भने, मलाई आपत्ति छैन, तर पब्लिकले प्रश्न उठाइरहे का छन् । फेयर गर्छु भनेर मात्र भएन, गरेर देखिनुपर्यो । पब्लिकलाई लाग्नुपर्यो ।’
कार्की, केपी शर्मा ओली नेतृत्वको अघिल्लो सरकारमा महान्यायाधिवक्ता रहेकाले अहिले यो मुद्धा हेर्दा स्वार्थ बाझिने उनीहरुको तर्क थियो ।उनले जनतामा उठेको प्रश्नलाई त्यतिकै डिसमिस गर्न नमिल्ने बताए ।
अर्का अधिवक्ता त्रिपाठीले पनि कार्कीले ओली संलग्न मुद्दा हेर्दा स्वार्थ बाझिने बताए ।तर प्रधानन्यायाधीश जबराले किन हुँदैन भनेर प्रश्न गरे ।
उनले कार्की ओलीले नियुक्त गरेको व्यक्ति भएको बताए । प्रधानन्यायाधीश जबराले चोलेन्द्र पनि केपी ओलीले नियुक्त गरेको भन्छन्, मेरो बारेमा पनि प्रश्न उठाए भयो नि त भनेका थिए ।
त्रिपाठीले त्यसको प्रतिवाद गरे । प्रधानन्यायाधीशलाई प्रधानमन्त्रीले नियुक्त नगर्ने बताए ।त्यसपछि बहस रोकेर पाँच न्यायाधीश छलफलमा गएका थिए । लगतै न्यायाधीश कार्कीले यो मुद्दा नहेर्ने घोषणा गरे ।
अर्को सुनुवाइ बुधबार हुनेछ। बुधबार बस्ने इजलासले नै मुद्दा संवैधानिक इजलासमा लाके कि बृहत् इजलासमा लाने भन्ने टुंगो लगाउने बताइएकाे छ।
