प्रधानमन्त्री ओलीले मंगलबार बोलाए सर्वदलीय बैठक, समसामयिक राजनीतिमाथि छलफल हुने
प्रधानमन्त्री केपी शर्मा ओलीले पछिल्लो राजनीतिक अवस्थाबारे छलफल गर्न मंगलबार सर्वदलीय बैठक बोलाएका छन् ।
सर्वदलीय बैठक भोलि (मंगलबार) विहान ११ बजे बैठक बोलाउने तयारी गरेको ओलीको सचिवालयले जनाएको छ ।
राजनीतिक र समसामयिक विषयमा छलफल गर्न सर्वदलीय बैठक बोलाएको प्रधानमन्त्रीका प्रमुख राजनीतिक सल्लाहकार विष्णु रिमालले बताए ।
नेपालको भूमि मिचेर भारतले सडक बनाएपछि गएको वैशाख ३१ मा संसदमा प्रतिनिधित्व गर्ने दलका प्रतिनिधिलाई प्रधानमन्त्रीले छलफलका लागि बोलाएका थिए । त्यस यता भने सर्वदलीय बैठक हुन सकेको छैन ।
बालुवाटारमा बालाइएको बैठकमा मुलुकको पछिल्लो राजनीतिक घटनाक्रम, कोरोना भाइरसको महामारीसँगको जुध्दाको परिस्थितिको समिक्षालगायतमा केन्द्रित हुने बालुवाटार स्रोतले जानकारी दिएको छ ।
विशेषगरी गणतन्त्र, धर्मनीरपेक्षता र संघीयतामाथि प्रहार हुन थालेपछि ओलीले सर्वदलीय बैठक बोलाएका हुन् । कतिपयले सत्तारुढ नेपाल कम्युनिस्ट पार्टीको विवादलाई अन्यत्र मोड्न ओलीले नयाँ अस्त्र फयाँकेको समेत भन्न थालेका छन् ।
तर, सडकमा राजावादीको प्रदर्शन बढ्दै गएको र त्यसप्रति आकर्षण पनि बढ्दै जान थालेपछि प्रधानमन्त्री ओली सतर्क भएको बुझिएको छ ।
राजावादीहरुले सडकमा गरिरहेको प्रदर्शन बढ्दै गएको तथा पछिल्लो समयमा नेकपाभित्र आन्तरीक विवाद उच्च विन्दुमा पुगेको अवस्थामा प्रधानमन्त्री ओलीले सर्वदलीय बैठक बोलाएका हुन् ।
यसबारे उनले सुरक्षा निकायका प्रमुखहरुसँग पनि जानकारी लिइसकेको बुझिएको छ ।
