उद्योग वाणिज्य महासंघको साधारण सभा आजदेखि शुरु हुँदै, निर्वाचन शनिवार
उद्योगी व्यवसायीहरुको छाता संस्था नेपाल उद्योग वाणिज्य महासङ्घको ५४ औँ वार्षिक साधारण सभा आजदेखि सुरु हुँदै छ ।
साधारणसभाको उदघाटन विहान बालुवाटारबाटै भर्चुअल माध्यमबाट प्रधानमन्त्री केपी ओलीले गर्ने कार्यक्रम रहेको महासंघले जनाएको छ ।
कोरोना जोखिमका कारण साधारण सभाको उद्घाटनलगायत औपचारिक कार्यक्रम यसपटक अभौतिक रूपमा सम्पन्न गर्न लागिएको छ ।
बन्दसत्र १२ गते हुनेछ । बन्दसत्र सकिएपछि १३ गते नयाँ कार्यसमितिका लागि निर्वाचन हुने छ । बन्दसत्रमा महासङ्घको
आर्थिकलगायत विभिन्न प्रतिवेदन पेस गर्ने र पास गर्ने कार्यक्रमसहित निर्वाचनमा वरिष्ठ उपाध्यक्षका उम्मेदवारहरूले नीतिगत मन्तव्यसमेत राख्ने छन् ।
महासङ्घको वैधानिक प्रावधान अनुरूप यो साधारण सभाले महासङ्घको अध्यक्षता वर्तमान वरिष्ठ उपाध्यक्ष शेखर गोल्छालाई हस्तान्तरण गर्नेछ । विधानअनुसार वरिष्ठ उपाध्यक्ष कार्यकालपछि स्वतः महासङ्घको अध्यक्ष बन्छन् ।
महासङ्घको नयाँ पदाधिकारीका लागि वरिष्ठ उपाध्यक्ष पदमा व्यवसायी चन्द्र ढकाल र किशोर प्रधानले उम्मेदवारी दिएका छन् । दुवै उम्मेदवारले यसपटक पूरै प्यानलसहित उम्मेदवारी दर्ता गराएका छन् ।
राजधानीको तीन स्थान नेपाल प्रज्ञा प्रतिष्ठान, बबरमहलस्थित कार्की ब्याङ्क्वेट र टेकुस्थित महासङ्घ सचिवालय बाट मतदान गर्ने कार्यक्रम रहेको महासंघले जानकारी दिएको छ ।
कोराना संक्रमित मतदाताहरुका लागि नेपाल प्रज्ञा प्रतिष्ठान कमलादीमा व्यवस्था गरिएको छ । भने बबरमहलस्थित कार्की ब्याङ्क्वेटमा एसोसिएट समूहको मतदान केन्द्र राखिएको छ । वस्तुगततर्फको मतदान भने टेकुस्थित महासङ्घ सचिवालय परिसरमै गर्ने निर्धारण गरिएको छ ।
गत चैतमा हुनुपर्ने महासंघको साधारणसभा तथा निर्वाचन कोभिड–१९ का कारण स्थगित भएको थियो । त्यसपछि पनि पटक–पटक साधारणसभाको मिति तोकिए पनि लकडाउनका कारण स्थगित हुँदै आएको थियो ।