कोरोना उपचारमा प्लाज्मा थेरापीले प्रभाव नपारेको निष्कर्ष
कोरोना भाइरस सङ्क्रमितहरूमाथि भइरहेको उपचार विधि ‘प्लाज्मा थेरापी’ ले उपचारमा कुनै प्रभाव नपार्ने अध्ययनहरूले पुष्टि हुँदै गएको छ ।
धरानमा मात्रै प्लाज्मा थेरापी गरिएका दुई सङ्क्रमितको उपचारको क्रममा मृत्यु भएको थियो । धरान-८ र १५ का दुई जना वृद्धहरू प्लाज्मा थेरापी गरेको केही दिनपछि ज्यान गएको थियो ।
धरानको बीपी कोइराला स्वास्थ्य विज्ञान प्रतिष्ठान धरानले पहिलो पटक धरान–८ का व्यवसायी नीरकुमार राजभण्डारीलाई प्लाज्मा थेरापी गरेको थियो ।
दोस्रो दिन धरान-१५ का अर्का व्यक्तिलाई पनि प्लाज्मा थेरापी गरिएको थियो । तर, दुवै जनाको ज्यान गएको थियो । भारतमा भएको एक अध्ययनले प्लाज्मा थेरापी उपचार विधिले कुनै प्रभाव नपार्ने निष्कर्ष निकालेको छ ।
भारतमा अहिले दैनिक चार अङ्कमा सङ्क्रमितहरूको ज्यान गइरहेको छ । भारतीय आयुर्विज्ञान अनुसन्धान परिषद् आईसीएमआरले गरेको वित्त पोषित बहुकेन्द्रीय अध्ययनको क्रममा यस्तो निष्कर्ष निकालिएको हो ।
प्लाज्मा थेरापी गरिएका बिरामीहरूमा गरिएको अध्ययनमा कुनै प्रभाव नपरेको उल्लेख गरिएको छ । उक्त अध्ययन मेडरजिभ जर्नलले प्रकाशित गरेको छ ।
तर, अहिलेसम्म यो अध्ययनको विषयमा समीक्षा गरिएको छैन । कोरोना सङ्क्रमितमा गरिएको प्लाज्मा थेरापीको प्रभाव पत्ता लगाउनका लागि २२ अप्रिलदेखि १४ जुलाईसम्म ३९ वटा निजी तथा सरकारी अस्पतालमा रहेका बिरामीहरूको अध्ययन गरिएको थियो ।
जसका लागि १ हजार २१० जना बिरामीलाई सहभागी गराइएको थियो । त्यसमध्ये २३५ जना प्लाज्मा थेरापी गरिएका बिरामीहरू थिए । अध्ययनका क्रममा उनीहरूलाई उ्रत्कृष्ट हेरविचार पनि गरिएको थियो ।
त्यस्तै २२९ जनालाई सामान्य हेरविचार गरेर उपचार गरिएको थियो । जसमा प्लाज्मा थेरापी गरिएकामा १३ दशमलव ७ प्रतिशत अर्थात ३४ जनाको मृत्यु भएको पाइएको छ भने उत्कृष्ट हेरविचार गरिएकामा १४ दशमलव ६ प्रतिशत अर्थात् ३१ ज्ना बिरामीको मृत्यु भएको थियो ।
भारतको केन्द्रीय स्वास्थ्य मन्त्रालयले जुन २७ तारिखका दिन प्लाज्मा थेरापीको उपचारको लागि अनुमति दिएको थियो । तर पनि खास प्रभाव पार्ने खाल्को नदेखिएको अध्ययनले देखाएको छ ।
रिपोर्टका अनुसार सहभागी गराएका बिरामीहरूको दैनिक ल्याब परीक्षणलगायत गरिएको थियो । २८ दिनसम्म टेलिफोनको माध्यमबाट स्वास्थ्य स्थितिका बारेमा आकलन गरिएको थियो ।
