अब जग्गा किनबेच सम्बन्धी काम गर्ने अधिकार स्थानीय तहलाई, रोक्का-फुकुवा इमेलबाटै
जग्गा नामसारी, लिखत पारित, लालपुर्जा वितरण लगायतका काम स्थानीय तहबाटै हुने व्यवस्था गर्न भूमि व्यवस्थापन तथा अभिलेख विभागले काम शुरु गरेको छ ।
जग्गा किनबेच सम्बन्धी काम गर्ने अधिकार स्थानीय तहलाई दिने प्रकृया शुरु भएको हो। त्यसैगरी जग्गा रोक्का र फुकुवाको काम इमेलबाट समेत हुनेछ ।
यसका लागि कानुनहरु संशोधन गर्न भूमि व्यवस्था तथा सहकारी मन्त्रालयका सचिवको संयोजकत्वमा समिति गठन भएको विभागका महानिर्देशक शेष नारायण पौडेलले बताए । समितिको प्रतिवेदन अनुसार मालपोत ऐन संशोधन हुने पौडेलको भनाई छ ।
