बस्ती भित्र पस्यो सेती नदी, ४२ घर डुबानमा, १५० जनालाई सुरक्षित स्थानमा सारियो
पोखरा : गण्डकी प्रदेश स्थित तनहुँको शुक्लागण्डकी नगरपालिका–४ पुल्चोक बजारमा ४२ घर डुबानमा परेका छन् ।
लगातारको वर्षाले सेती नदी बहाव निकैनै बढेको छ । सेती र सुरौंदी खोलासमेत पुल्चोक बजारमा पसेपछि ४२ घर डुबानमा परेका हुन् । वडा नम्बर ४ का २८ घर र वडा नम्बर ८ का १४ घरमा डुबानमा परेपछि १ सय ५० जनाभन्दा बढीलाई सुरक्षित स्थानमा सारिएको छ ।
‘सेती नदी बसेर बस्तीभित्रै छिरेपछि त्यहाँका वासिन्दालाई सुरक्षित स्थानमा सारिएको छ । केही चौपायालाई बगाएको पनि छ ।
सेती र सुरौंदी खोलाले थप क्षति पुर्याउन सक्ने क्षेत्रका वासिन्दालाई पनि सुरक्षित रहन आग्रह गरिएको वडाध्यक्ष कृष्णप्रसाद रेग्मीले बताए । नेपाली सेना र प्रहरीसँगै जनप्रतिनिधि पनि डुबानमा परेको क्षेत्रमा खटिएका छन् । क्षतिको विवरण आउन बाँकी छ ।
