सुदूरपश्चिम प्रदेश : पाँच हजार २४४ नेपाली भित्रिए, ८१५ भारतीय बाहिरिए
शुक्रबार भारतमा कामका लागि गएका पाँच हजार बढी नेपाली नागरिक नेपाल भित्रिएका छन् । कञ्चनपुरको गड्डाचौकी र कैलालीको गौरीफन्टा नाकाबाट पाँच हजार २४४ जना नेपाली नागरिक नेपाल भित्रिएका छन् ।
सात सय १५ भारतीय नागरिक आफ्नो देश फिर्ता गएका छन् । जिल्ला प्रहरी कार्यालय, कञ्चनपुरका प्रहरी नायब निरीक्षक रवीन्द्रनाथ पौडेलले बिहीबारभन्दा केही सङ्ख्या घटेको बताउँदै गड्डाचौकी नाकाबाट एक हजार ५१ जना नेपाली नागरिक भित्रिएको बताउनुभयो ।
उक्त नाकाबाट भारत जानेको सङ्ख्या भने शुक्रबार अरु दिनभन्दा बढेको छ । चार सय २९ भारतीय नागरिक गड्डाचौकी नाका भएर भारत गएका छन् ।
कैैलालीको गौरीफन्टा नाकाबाट नेपाल आउने नेपालीको सङ्ख्या बिहीबार भन्दा शुक्रबार बढेको छ । जिल्ला प्रहरी कार्यालय, कैलालीका अनुसार उक्त नाकाबाट चार हजार १९३ नेपाली नागरिक भित्रिएका छन् भने २८६ भारतीय नागरिक बाहिरिएका छन् ।
योसँगै सुदूरपश्चिम प्रदेशका विभिन्न नाका भएर जेठ २ गतेयता नेपाल भित्रिने नेपाली करिब ८४ हजार पुगेको छ भने बाहिरिने भारतीय नागरिक करिब १२ हजार पुगेको छ ।
