चीनपछि दक्षिण कोरीयामा कोरोना भाइरसको विरामी ह्वातै बढ्यो
दक्षिण कोरियामा एकै दिनमा कोरोना भाइरसको सङ्क्रमण पुष्टि भएका मानिसको सङ्ख्या झण्डै दोब्बरले बढ्न पुगेको छ
बर्तमान समयमा विश्वको चासोको विषय बनेको कोरोना भाइरस अहिले विभिन्न देशमा फैलिनेक्र जारि रहेको छ र पछिल्लो समयमा दक्षिण कोरियामा कोभिड–१९ फैलीने क्रम तिब्र रहेको छ ।
शुक्रबारसम्ममा २२९ जनामा कोरोना सङ्क्रमण रहेकोमा शनिबार एकैदिन २०४ जनामा सङ्क्रमण भएर सङ्क्रमितको संख्या ४३३ पुगेको बीबीसीले जनाएको छ ।
चीनमा अहिलेसम्म कोरोना भाइरसको कारण २ हजार तीन सय ४५ जनाको ज्यान गएको छ भने ७६ हजार दुई सय ८८ जनामा सङ्क्रमण भएको पाइएको छ । चीनबाहिर विभिन्न देशमा गरी २० जनाको ज्यान गएको र १ हजार दुई सयभन्दा धेरैमा सङ्क्रमण भएको विश्व स्वास्थ्य सङ्गठन (डब्लुएचओ) ले जनाएको छ ।
दक्षिण कोरियाका स्वास्थ्य उपमन्त्री किम गा लिपले कोरोना भाइरसको प्रकोप गम्भीर चरणमा प्रवेश गरेको बताएका छन् । दक्षिण कोरियामा कोरोना भाइरसबाट २ जनाको ज्यान गइसकेको छ । डाएगु र चेओङ्डोलाई विशेष हेरचाह क्षेत्र घोषणा गरिएको छ । डाएगुका सडकमा मानिस निस्कन छाडेका छन् ।
कतिपय सैनिकहरूमा पनि कोरोना भाइरस सङ्क्रमण भएको पाइएपछि दक्षिण कोरियाले सेनालाई पनि निश्चित घेरामा सीमित गरेको छ ।
चीनमा अधिकारीहरूले नयाँ सङ्क्रमण र ज्यान गुमाउनेको सङ्ख्या घटिरहेको बताएकै बेला दक्षिण कोरियामा भने सङ्क्रमितको सङ्ख्या बढेको हो ।
चीनबाहिर सङ्क्रमितको सङ्ख्या तुलनात्मक रुपमा थोरै भए पनि स्वरुप भने चिन्ताको विषय रहेको डब्लुएचओ का डाक्टर टेड्रोस अदानोमले बताएका छन् ।
