आयुषमान खुरानाको चलचित्र अंधाधुन्धले चीनमा गर्यो शानदार व्यापार
बलिउड अभिनेता आयुषमान खुरानाको चलचित्र अंधाधुन्ध रिलिज भएको छैटौँ दिन चिनियाँ बक्स अफिसमा १०० करोडको आँकडा पार गरेको छ ।
फिल्मले चीनमा प्रदर्शन भएको ६ दिनमा १६.६६ मिलियन डलर अर्थात ११५ करोड २२ लाख भारतीय रुपैयाँ बराबरको कारोबार गरेको बलिउड व्यापार विश्लेषक तरण आदर्शले ट्वीट गरेर जानकारी दिएका छन् ।
उक्त फिल्म चिनियाँ बक्स अफिसमा पियानो प्लेयरको नाममा रिलिज भएको छ। पियानो बजाउने एक दृष्टिबिहीन युवकको कथामा बनेको फिल्मको निर्देशन श्रीराम राघवनले गरेका छन्। फिल्ममा आयुषमान खुराना, राधिका आप्टे र तब्बु को मुख्य अभिनय रहेको छ। अप्रिल ३ मा रिलिज भएको फिल्म चीनका ५ हजार स्क्रिनमा लागेको छ।
भारतमा २०१८ अक्टुबर ५ मा रिलिज भएको चलचित्र भारतीय बक्स अफिसमा ७४ करोड ५९ लाख लाईफटाइम कमाई गरेका थियो।