बालुवाटारमा मन्त्रिपरिषदको नियमित बैठक, प्रतिनिधिसभाको बैठक आह्वान लगायतका निर्णय हुँदै
प्रधानमन्त्रीको सरकारी निवास बालुवाटारमा मन्त्रिपरिषदको नियमित बैठक सुरु भएको छ ।
सर्वोच्च अदातलको संवैधानिक इजलासले सरकारद्वार बिघठित प्रतिनिधिसभालाई पुर्नस्थापित गरिदिएपछि उक्त संसदको बैठक आह्वान लगायतका निर्णय गर्न प्रधानमन्त्री केपी शर्मा ओलीले उक्त मन्त्रिपरिषद बैठक बोलाएका हुन् ।
बैठकबाट प्रतिनिधिसभाको बैठक आह्वान गर्न राष्ट्रपति विद्यादेवी भण्डारीसमक्ष सिफारिस गर्ने तयारी छ । बिहीबारमात्र राष्ट्रपति भण्डारीसँग प्रधानमन्त्री ओलीले परामर्श गरेका थिए ।
सरकारको सिफारिसमा राष्ट्रपतिले संसद बैठक आह्वान र अन्त्य गर्ने संवैधानिक व्यवस्था छ । प्रधानमन्त्री केपी शर्मा ओलीको सिफारिसमा राष्ट्रपति भण्डारीले गत पुस ५ गते संसद विघटन गरेकी थिइन् ।
तर सर्वोच्च अदालतले यही फागुन ११ प्रतिनिधिसभा विघटन गर्ने ओलीको कदमलाई असंवैधानिक ठहर गरेको थियो । साथै सर्वोच्चले १३ दिनभित्र संसद बैठक आह्वान गर्न सरकारलाई आदेश दिएको थियो ।
सो आदेशअनुसार आगामी २३ गतेभित्र संसद बैठक आह्वान गर्नुपर्छ ।
