राष्ट्रिय सभाका २ समिति सभापति आज निर्विरोध निर्वाचित हुँदै
४ चैत, काठमाडौं । राष्ट्रिय सभाका दुई वटा विषयगत समितिले आज सभापति पाउँदैछन् । दिगो विकास तथा सुशासन समितिको सभापति र राष्ट्रिय सरोकार तथा समन्वय समितिले आज सभापति पाउन लागेको हो ।
ती समितिहरुका सभापतिका लागि शनिबार मनोनयन दर्ता भएको थियो । दिगो विकास तथा सुशासन समितिको सभापति पदमा नेपाली कांग्रेसकी कमला पन्त र राष्ट्रिय सरोकार तथा समन्वय समितिको सभापतिमा एमालेका सोनाम गेल्जेन शेर्पाको मात्र उम्मेदवारी परेको छ ।
उनीहरु एकल उम्मेदवार भएकाले आइतबार निर्विरोध निर्वाचित भएको औपचारिक घोषणा गरिने छ ।
प्रमुख चार दल कांग्रेस, एमाले, माओवादी केन्द्र र एकीकृत समाजवादीले राष्ट्रिय सभाका चार समितिहरुमध्ये एक-एक वटाको सभापति भागबण्डा गरेर लिएका छन् ।
राष्ट्रिय सभाकै प्रत्यायोजित व्यस्थापन तथा सरकारी आश्वासन समितिको सभापतिमा माओवादी केन्द्रका माया प्रसाद शर्मा र विधायन व्यस्थापन समिति सभापतिमा एकीकृत समाजवादीका जयन्तीदेवी राई सभापति छन् । उनीहरुको कार्यकाल बाँकी भएकाले समितिको सभापतिमा निरन्तरता पाएका छन् ।
दिगो विकास तथा सुशासन समितिको सभातिमा यसअघि कांग्रेसका प्रकाश पन्थ सभापति थिए । उनको कार्यकाल गत २० फागुनमा सकिएपछि कांग्रेसकै भागबाट कमला पन्तको एकल उम्मेदवारी दर्ता भएको हो ।
शनिबार मनोनयन दर्ता गर्दा कांग्रेस सांसद पन्तको प्रस्तावकमा कांग्रेस सांसद नारायणदत्त भट्ट र समर्थकमा एमाले सांसद शारदादेवी भट्ट रहे ।
यसैगरी राष्ट्रिय सरोकार तथा समन्वय समितिको सभापतिमा यसअघि नेकपा एमालेकी दिलकुमारी रावल (थापा) सभापति थिइन् । उनको पनि कार्यकाल पनि २० फागुनमै सकिएकाले सो समितिको सभापतिमा एमालेकै सोनाम गेल्जेन शेर्पाको एकल उम्मेदवारी दर्ता भयो ।
शेर्पाको प्रस्तावकमा माओवादी केन्द्रका सांसद गोपी बहादुर अछामी तथा समर्थकमा नेपाली कांग्रेसका दुर्गा गुरुङ र एमालेका इन्दिरादेवी गौतम छन् ।
राष्ट्रिय सभामा एमाले संसदीय दलका नेता देवेन्द्र दाहालका अनुसार यसअघि सभापति रहेकाहरुलाई निरन्तरता दिएर बाँकी दुईटामा यसअघि जसका थिए सोही दले पाउने गरी उम्मेदवारी दर्ता गराइएको हो ।
एकल उम्मेदवारी परेकाहरु स्वतः निर्वाचित भएको घोषणा आइतबार हुनेछ ।
