रास्वपा सभापति रवि लामिछाने उपप्रधान एवम् गृहमन्त्री बन्ने, आजै शपथ गराउने तयारी
राष्ट्रिय स्वतन्त्र पार्टीका सभापति रवि लामिछाने उपप्रधान एवम् गृहमन्त्री बन्ने भएका छन् । नयाँ गठबन्धनमा भएको सत्ता भागबन्डामा सभापति रवि लामिछाने उपप्रधान तथा गृहमन्त्री भन्ने सहमति भएको हो ।
राष्ट्रिय स्वतन्त्र पार्टी नयाँ गठबन्धनमा सभापति लामिछानेकै नेतृत्वमा सरकारमा सहभागी हुने निश्चित बनेको हो । लामिछानेसहित नयाँ बन्ने मन्त्रीहरूको शपथ आज बेलुकी ५ बजे गराउने तयारी छ ।
प्रचण्ड नेतृत्वको गठबन्धनमा रास्वपाले उपप्रधान र गृहसहित ३ मन्त्री र एक राज्य मन्त्री पाउने निश्चित भएको छ । सत्ता गठबन्धनको बालुवाटारमा बसेको बैठकले दलहरूले पाउने मन्त्रालयको टुंगो लगाएको हो ।
‘उपप्रधान एवम् गृहसहित ३ मन्त्रालय र एक मन्त्रालयमा रास्वपाले राज्यमन्त्री पाउने टुंगो लागेको छ,’ उच्च स्रोतले भन्यो, ‘अब मन्त्रालय र मन्त्रीको टुंगो लगाउन अन्तिम कसरत बाँकी छ ।’
रास्वपाले आफ्ना सांसदहरूसँग मन्त्री बन्न इच्छुक भएकाहरूलाई आफ्नो योजना र दाबी पेश गर्न समेत भनिसकेको छ । जसअनुसार करिब करिब मन्त्री बन्ने उम्मेदवारको टुंगो लागेको छ ।
रास्वपाबाट पार्टी सभापति बाहेक अन्य उम्मेदवार मन्त्रीमा नदोहोरिन सक्ने सम्भावना बढेको एक नेताले बताए ।