प्रधानमन्त्रीसँग रास्वपाको अडान : कि नयाँ सहमति हुनुपर्यो कि पुरानो लागु हुनुपर्यो
राष्ट्रिय स्वतन्त्र पार्टी (रास्वपा)ले प्रधानमन्त्री पुष्पकमल दाहाल ‘प्रचण्ड’लाई सहमति कार्यान्वयन गर्न दबाब दिन थालेको छ । सरकार गठन हुँदाको सहमतिअनुसार पाएका मन्त्रालय रास्वपालाई नै दिन आग्रह गर्दै त्यसो नगरे सरकारबाट बाहिरिने जानकारी गराइएको हो ।
“विगतमा भएको सहमति कार्यान्वयन भएन भने रास्वपा सरकारमा बस्दैन,” रास्वपाका सहमहामन्त्री कविन्द्र बुर्लाकोटीले भने, “प्रधानमन्त्रीले सहमति पालना गर्नु भएन भने घुस्रिएर सरकारमा बस्ने कुरा हुँदैन । कि पुरानो सहमति कार्यान्वयन हुनुपर्यो कि नयाँ सहमति हुनुपर्यो ।”
उनले सहमति विपरीत सरकारमा बस्दा भोलि थप हेपिने अवस्था बन्न सक्ने बताए । मंगलबार प्रधानमन्त्री प्रचण्डसँग भेट गरी रास्वपाका सभापति रवि लामिछानेले सरकारका विषयमा समयमै निर्णय गर्न ‘अल्टिमेटम’ दिएका थिए ।
उनले आफूलाई उपप्रधान एवं गृहमन्त्रीमा पुन : नियुक्त गर्न माग गरे । उनले ६ महिनाभित्र हुने निर्वाचनबाट आफू पुन : सांसद भएर आउने आश्वासन समेत दिएका थिए ।
प्रधानमन्त्री प्रचण्डले भने मन्त्री बन्न हतारो नगर्न सुझाव दिएका थिए । उनले राहदानीका विषयमा छानबिन भइरहेको र सर्वोच्च अदालतको फैसलाको पूर्णपाठ पनि आउन बाँकी रहेको भन्दै स्वार्थ बाझिने गरी मन्त्री नबन्न आग्रह गरेका हुन् ।
लामिछानेले मंगलबार नै नेकपा (एमाले)का अध्यक्ष ओलीसँग पनि भेटवार्ता गरेका थिए । अध्यक्ष ओलीले लामिछानेलाई तत्काल मन्त्रीमा नियुक्त गरी गठबन्धन जोगाउन प्रधानमन्त्रीलाई दबाब दिइरहेका छन् ।
