उम्मेदवारी दिएको पदहरुमा मात्र राष्ट्रिय दलको चुनाव चिह्न रहने, अन्य सबै उम्मेदवार स्वतन्त्र
स्थानीय तहहरुको नयाँ नेतृत्वका लागि हुने पालिका निर्वाचनको मतपत्रमा उम्मेदवारी परेका दलहरूको मात्र चुनाव चिन्ह हुने भएको छ ।
देशभरको मतपत्रमा ६ ओटा राष्ट्रिय दलहरूको चुनाव चिन्ह अनिवार्य छापिएपनि अन्य दलहरूले भने स्वतन्त्र हैसियतमा चुनाव चिन्ह रोज्नुपर्ने भएको छ ।
यता, ६ वटा महानगरपालिकामा उम्मेदवारहरुको अन्तिम नामावली प्रकाशित भइसकेपछि मात्र मतपत्र छापिने निर्वाचन आयोगले जनाएको छ ।
प्रमुख निर्वाचन आयुक्त दिनेश थपलियाका अनुसार यो आयोगको पूर्वनिर्णय हो । जसअनुसार ६ वटा महानगर र भक्तपुरका चार नगरपालिकाको मतपत्र उम्मेदवारको अन्तिम सूची प्रकाशित भइसकेपछि मात्र छापिनेछ ।
यसो हुँदा राष्ट्रिय दलहरुले समेत जुन जुन पदमा उम्मेदवारी दिन्छन्, त्यहाँ चुनाव चिह्न रहन्छ, उम्मेदवारी नदिएको पदमा चुनाव चिह्न रहँदैन ।
६ ओटा दलका उम्मेदवारले स्थायी चुनाव चिन्ह पाउने र अन्य दलले स्वतन्त्र हैसियतमा चुनाव चिन्ह रोज्नुपर्ने आयोगको कथन छ ।
साथै, गठबन्धन गरेर चुनाव लडिए पनि पछि सोही चिन्ह भएको पार्टीको ह्विप लाग्ने आयोगले जनाएको छ ।
