ठेकेदार स्थानीय निर्वाचनमा लड्न नपाउने प्रावधानविरुद्ध निर्माण व्यवसायी अदालत जाने
निवार्चन आयोगले चुनावमा निर्माण व्यवसायी सहभागी हुन नपाउने गरी बनाएको प्रावधानको नेपाल निर्माण व्यवसायी महासंघले चर्को बिरोध गरेको छ ।
आगामी बैशाख ३० गते हुने स्थानीय तह निर्वाचनमा निर्माण व्यवसायी उम्मेदवार बन्न नपाउने गरी बनाएको प्रावधान विरुद्ध अदालत जाने तयारी गरेको महासंघका अध्यक्ष रवि सिंह जानकारी दिए ।
उनले आयोगले गरेको निर्णय संविधानले दिएको मौलिक हक विरुद्ध रहेको भन्दै त्यसका लागि कानुनी उपचार खोज्ने बताए । यसबारे आफूहरुले कानुन व्यवसायीसँग छलफल गरीरहेको बताएका छन् ।
साथै उनले महासंघको तर्फबाट अदालत जाने कि ब्यक्तिको तर्फबाट जाने भन्ने बारेमा छलफल भइरहेको समेत बताए । उनले आफूहरुले यसबारे छिट्टै विज्ञप्ति पनि जारी गर्ने बताए ।
बुधबार बसेको आयोगको बैठकले ठेक्कापट्टामा सहभागीहरू स्थानीय तहको चुनावमा उम्मेदवार बन्न नपाउने निर्णय गरेको थियो ।
एक अध्ययन अनुसार २०७४ सालमा भएको स्थानीय तहको निर्वाचनबाट स्थानीय प्रमुख, उपप्रमुख, वडाध्यक्ष लगायत गरेर ठेक्कापट्टामा सहभागी १६९ जनप्रतिनिधि निर्वाचित भएका थिए ।
