कांग्रेसको केन्द्रीय समितिको बैठकले आज गठबन्धनको पक्षमा सैद्धान्तिक निर्णय लिने
नेपाली कांग्रेसको आज बस्ने केन्द्रीय कार्यसमितिको बैठकले स्थानीय निर्वाचनमा तालमेलका लागि गठबन्धनको पक्षमा सैद्धान्तिक निर्णय लिने भएको छ ।
आज (सोमबार)बिहान ११: ३० मा पार्टी कार्यालय सानेपामा बस्ने केन्द्रीय कार्यसमिति बैठकले गठबन्धनको पक्षमा सैद्धान्तिक निर्णय लिने प्रवक्ता प्रकाश शरण महतले जानकारी दिए ।उनले भने, ‘आजको बैठकले गठबन्धनको पक्षमा सैद्धान्तिक निर्णय लिन्छ । मोडालिटीबारे पछि टुङ्गो लाग्छ ।’
बैठकमा संसदीय समिति गठबन्धनको एजेण्डा रहे पनि छलफल गठबन्धन केन्द्रित छ । प्रवक्ता महतले आजै गठन हुने नहुने टुङ्गो भने छैन भनेका छन् ।
उनका अनुसार जिल्लागत भ्रमणबाट फर्किएका प्रतिनिधिको रिपोर्टिङ पछि पदाधिकारीले धारणा राखेर आजै बैठक टुङ्ग्याउने तयारी छ ।
शुक्रबारदेखि जारी केन्द्रीय कार्यसमिति बैठकमा आइतबारसम्म ‘घर घर जाऔँ काँग्रेस जिताऔँ’ अभियानबाट फर्किएका ६० जना केन्द्रीय सदस्य तथा प्रतिनिधिले रिपोर्टिङ सुनाएका छन् ।
साथै ६ जना प्रदेश सभापतिले पनि रिपोर्टिङ सुनाएका छन् । आइतबार अभियानमा खटेका बाहेक १६ जना केन्द्रीय सदस्यले आफ्नो धारणा राखेका थिए । आजको बैठकमा १७ जना प्रतिनिधि र शीर्ष नेताले धारणा राख्ने प्रवक्ता महतले बताए ।
सभापति शेरबहादुर देउवा निकटकै केन्द्रीय सदस्यले पनि चुनावी तालमेलको पक्षमा र नेता शेखर कोइराला समूहका नेताहरूले तालमेलको विपक्षमा मत राखेका छन् ।वरिष्ठ नेता रामचन्द्र पौडेलसहितका शीर्ष नेता तालमेलको पक्षमा देखिएका छन् ।
