यात्रुको अभावमा नेपाली रेल अब महिनाको १५ दिन मात्रै चल्ने
नेपाली रेल अब एक दिन बिराएर महिनाको १५ दिन मात्रै गुडाइने भएको छ । पछिल्लो एक महिनादेखि बिना यात्रु दिनहुँ गुड्दै आएको रेल अब महिनाको १५ दिन मात्रै गुड्ने भएको हो ।
गत फागुन १ गतेदेखि दिनमा एक पटक बिना यात्रुको रेल भारतको जयनगरदेखि जनकपुरधाम हुँदै कुर्थासम्म गुडिरहेको छ । तर, अब महिनाको १५ दिन मात्रै रेल गुडाइने नेपाल रेल्वे कम्पनीका महाप्रबन्धक निरञ्जन झाले जानकारी दिए ।
उनका अनुसार अब एक दिन बिराएर रेल चल्नेछ ।होलीमा रेल बन्द गरिएको र होलीपछि एक दिन बिराएर गुडाइने उनले बताए । रेल गुडिरहे पनि आम्दानी भएको छैन ।
महाप्रबन्धक झाले आम्दानी नभएसम्म लागत खर्च कम गर्ने उद्देश्यले एक दिन बिराएर रेल चलाइने बताए ।रेल गुडाउने अध्यादेश निष्क्रिय भएका कारण उद्घाटनको मिति निर्धारण हुन नसकेको पनि उनले बताए ।
उनले संघीय सरकारले पुनः रेल सम्बन्धी अध्यादेश ल्याउने तयारी गरेको भन्दै सम्भवतः सोमबारसम्म अध्यादेश आउने बताए । अध्यादेश आएर कानुन बनिसकेपछि उद्घाटन भएर रेल सेवा नियमित हुने उनले बताए ।
झाले फागुनको दोस्रो साता नै नेपाल र भारतका प्रधानमन्त्रीबाट संयुक्त रूपमा रेलको उद्घाटन गराउने तयारी भए पनि कानुनकै अभावमा हुन नसकेको बताए ।
जनकपुर–जयनगर रुटमा रेल सञ्चालन गर्नका लागि गत वर्ष नेपाल सरकारले ८४ करोड ६५ लाख रुपैयाँमा भारतबाट रेल खरिद गरी ल्याएको थियो ।
भारतको कोकन रेल्वे कर्पोरेसन लिमिटेडबाट खरिद गरिएको रेल सोही कम्पनीका मेकानिकल इन चिफ दीपक त्रिपाठीले २ असोज २०७७ मा नेपाल रेल्वे कम्पनी लिमिटेडका तत्कालीन महाप्रबन्धक गुरु भट्टराईलाई हस्तान्तरण गरेका थिए ।
नेपाल रेल्वे कम्पनीका अनुसार रेल १६०० एचपी डेमुको हो । रेलको अगाडि र पछाडि समेत इन्जिन छ । प्रतिघण्टा १ सय १० किलोमिटरको गतिमा गुड्नसक्ने क्षमताको यो रेलले एकटकमा करिब १३ सय यात्रुहरू बोक्न सक्छ ।
