अर्थतन्त्रका सूचक खराब रहेको भन्दै ओली गरे सरकारको कडा आलोचना
नेकपा एमालेका अध्यक्ष केपी शर्मा ओलीले देशमा अर्थतन्त्रका सूचक खराब रहेको उल्लेख गर्दै वर्तमान सरकारको कडा आलोचना गरेका छन् । अर्थतन्त्रका सूचकबारे जनताले जान्न पाउनुपर्ने भन्दै उनले यो सरकारका पालामा नै अर्थतन्त्र खराब भएको जिकिर गरे ।
स्थानीय तह निर्वाचन केन्द्रित प्रशिक्षण तथा अभिमुखीकण कार्यक्रमलाई सम्बोधन गर्दै उनले भने ‘नेपाली जनताले जान्न पाउनुपर्छ अहिले अर्थतन्त्रको अवस्था के छ, लटपट कुरा गरेर हुन्न, देश डुब्दैछ ।’
मुद्रास्फिति ६ वर्षयताकै उच्च रहेको र महँगी बढेको भन्दै उनले सरकारको आलाेचना गरे । सरकार गठन भएको ६ महिनामा ब्यापार घाटा ५५ प्रतिशतले बढेकोमा पनि उनले आपत्ति जनाए । ‘६ महिनामा व्यापार घाटा ८ खर्बभन्दा बढी पुगिसकेको छ, विदेशी मुद्राको सञ्चिति घट्दै गएर साढे ६ महिनाको आयात धान्न नसक्ने स्थितिमा छ’ ओलीले भने । त्यस्तै रेमिट्यान्समा ७ प्रतिशतले कमी आउनुमा पनि सरकारको कमजोरी रहेको उनको भनाइ छ ।
‘हुण्डी र सुन तस्करी फस्टाएको छ, सुशासनको नेतृत्व गर्नुपर्ने अर्थ मन्त्रालय पोलिसी सेटिङमार्फत अपचलनमा लागेको छ’ ओलीले आरोप लगाए । चालु खाता घाटा ६ महिनामा ३ खर्ब नाघेको र बैंकहरुमा तरलताको अभावले व्यवसायको गतिशिलता ठप्प रहेको भन्दै उनले सरकारको आलोचना गरे । उनले ६ महिनामा १३. ४४ प्रतिशत मात्रै पुँजीगत खर्च भएकोमा सरकारको विराेध गरे। प्रदेशमा जथाभावी मन्त्रालय गठन गरिएको र यसले अर्थतन्त्रलाई झन् खराब बनाएको उनको आरोप छ ।
