काठमाण्डौसहित देशभर बाक्लो हुस्सु लाग्दा कठ्याङ्ग्रिँदो चिसो बढ्यो
काठमाडौंसहित देशभर कठ्याङ्ग्रिँदो चिसो बढेको छ । आज बिहानैदेखि लागेको बाक्लो हुस्सु, कुहिरोका कारण काठमाण्डौको भिजिबिलिटी घटेको छ ।
यसले गर्दा आन्तरिक र बाह्य उडान अवतरण नै ठप्प भएको छ । बिहानदेखि नै कुनै पनि उडान अवतरण हुन सकेको छैन । बाक्लो हुस्सुले अवतरण हुन नसकेपछि काठमाण्डौ आएका आठ वटा जहाज आकाशमै घुमिरहेका छन् ।
तर, काठमाण्डौ उपत्यकामा लागेको बाक्लो हुस्सु, कुहिरो बिस्तारै हट्न थालेको मौसमविद्ले जानकारी दिएका छन् ।मौसमविद्का अनुसार बिहान एक सय मिटरमा झरेको भिजिबिलिटी अहिले दुई सय मिटरमा पुगेको छ ।
अबको एकरढेड घण्टा पछि उडान अवतरण गर्न मिल्ने गरी भिजिबिलिटी बढ्ने सम्भावना रहेको उनको भनाइ छ । घाम नलाग्दा कठ्याङ्ग्रिँदो चिसो छ ।
काठमाण्डौको बिहान पौने नौ बजेको न्यूनतम तापक्रम ४ दशमलव ५ डिग्री सेल्सियस मापन गरिएको छ । आज दिउँसो उपत्यकामा घाम लाग्ने मौसमविद्ले बताएका छन् ।
