कांग्रेसको रामचन्द्र पौडेल पक्षको बैठक बस्दै
नेपाली कांग्रेसका बरिष्ठ नेता रामचन्द्र पौडेल पक्षको बैठक आज बस्ने भएको छ । बैठक दिउँसो २ बजेपछि नेता प्रकाशमान सिंहको निवास ठमेलमा बस्ने तय भएको प्रकाशमानको सचिवालयले जानकारी दिएको छ ।
क्रियाशील सदस्यता विवाद, आगामी महाधिवेशन र सरकारका विषयमा छलफल गर्न बैठक बस्न लागेको पौडेल पक्षका एक नेताले जानकारी दिएका छन् ।
कांग्रेसमा क्रियाशील सदस्यताको विवादका कारण आगामी भदौमा तय भएको १४ औं महाधिवेशनको पूर्वनिर्धारित कार्यतालिका प्रभावित भएको छ ।
यसपटक महाधिवेशन गर्नैपर्ने बाध्यताका बीचमा पार्टी सभापति शेरबहादुर देउवा गत असार २९ गते प्रधानमन्त्री नियुक्त भएका थिए ।
प्रधानमन्त्री पद सम्हालेको तीन साता कटिसके पनि उनले मन्त्रिपरिषद विस्तार गर्न सकेका छैन् । देउवा सरकार सञ्चालन र महाधिवेशन दुवैको दबाबमा परेका छन् ।