काठमाडौं उपत्यकामा २४ घण्टामा थपिए १४९३ जना नयाँ कोरोना संक्रमित
काठमाडौं उपत्यकामा पछिल्लो २४ घण्टामा १४९३ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
यसमध्ये काठमाडौंमा ११३९, ललितपुर २४१ र भक्तपुरमा ११३ जना संक्रमित थपिएका हुन् । मंगलबारको तुलनामा यो संख्या कम हो । हिजो काठमाडौँमा मात्र १८६३ जनामा कोरोना भाइरस संक्रमण पुष्टि भएको थियो ।
यस्तै भक्तपुरमा ३२३ र ललितपुरमा ४२७ जनामा संक्रमण पुष्टि भएको थियो ।पछिल्लो २४ घण्टामा देशभर थप ६७१४ जनामा कोरोना भाइरसको संक्रमण पुष्टि भएको छ ।
सोही अवधिमा थप ६७१६ जना निको भएका छन् भने थप १४५ जनाले ज्यान गुमाएका छन् ।
