चीनबाट अनुदानमा ल्याएको कोरोना खोप ४० देखि ५९ बर्षका व्यक्तिलाई लगाइने
नेपाललाई चीनले अनुदानमा दिएको कोरोनाविरुद्धको खोप ४० देखि ५९ बर्षसम्मका व्यक्तिलाई लगाइने भएको छ ।
कोरोना भाईरस विरुद्धको इन्सिडेण्ट कमाण्ड सिस्टमको बैठकले सो खोप ४० देखि ५९ वर्ष उमेर समूहका मानिसलाई लगाउने निर्णय गरेको स्वास्थ्य तथा जनसंख्या मन्त्रालयले जनाएको छ ।
यसका लागि अस्पताल छनोट गरी पूर्वाधारको हिसाबले उपयुक्त अस्पतालबाट ती उमेर समूहका व्यक्तिलाई चाँडै नै खोप दिइने सरकारले जनाएको छ ।
नेपालमा अहिले पाँच लाख ४८ हजार मात्रा ‘कोभिशिल्ड’ र चीनबाट प्राप्त आठ लाख मात्रा ‘भेरोसेल’ खोप मौज्दात रहेको छ ।चीन सरकारले आठ लाख मात्रा भेरोसेल खोप नेपाललाई उपलब्ध गराएको थियो । उक्त खोप यही चैत १६ गते चीनबाट नेपाल ल्याइएको हो ।
भारतबाट प्राप्त एस्ट्राजेनेका खोपको पहिलो डोज लगाईएका मानिसलाई कहिलेबाट दोस्रो डोज दिने भन्ने अझै निश्चित भएको छैन ।
