नेकपा नेता भीम रावलद्वारा दशैँ भत्ताको रकम नलिने घोषणा
नेकपा नेता भीम रावलले कोरोनाको कारण विषम परिस्थितिमा दशैँ भत्ताको रकम नलिने भएका छन् ।
उनले ट्विटरमा कोरोना महामारीका कारण स्वास्थ्य चुनौती र आर्थिक कठिनाइलाई मनन गर्दै दशैँ भत्ता नलिने व्यवस्था गर्नुपर्ने बताएका छन् ।
नेता रावलले आइतबार सामाजिक सञ्जात ट्विटर मार्फत कुनै पनि जनप्रतिनिधिले दशैँ भत्ता नलिने व्यवस्था गरियोस् भनेका छन् ।
उनले ट्विटरमा भनेका छन्, ‘खातामा भत्ताको रकम राखिएको थाहा पाइयो । हालको विषम स्वास्थ्य चुनौती र आर्थिक कठिनाइलाई मनन गरी कुनै पनि जनप्रतिनिधिले दशैं भत्ता नलिने व्यवस्था गरियोस् । सांसदहरूले उक्त भत्ता लिनुहुन्न भन्नेमा मेरो समर्थन छ । मेरो खाताबाट रकम कट्टी गर्न मञ्जुरी छ ।’
यसअघि नेकपाका नेता नारायणकाजी श्रेष्ठले पनि भत्ता नलिने घोषणा गरिसकेका छन् ।संघीय कानुनमा सांसदहरूले घरबहाल, बिजुली, पानी, सञ्चार खर्च, बैठक भत्ता र भ्रमण भत्ता पाउने व्यवस्था भए पनि दशैं खर्चसम्बन्धी व्यवस्था छैन ।
