२१ वर्षीया युवतीलाई बलात्कार गरेको आरोपमा गौशालाका एक प्रहरी पक्राउ
२१ वर्षीया युवतीलाई जबरजस्ती करणी गरेको अभियोगमा एक जना प्रहरी कर्मचारी पक्राउ परेका छन् ।
गौशालाका प्रहरी नायब उपरीक्षक जितेन्द्र बस्नेत बताए अनुसार २१ वर्षीया युवतीले दिएको किटानी जाहेरीका आधारमा सिंहलाई पक्राउ गरिएको हो ।
पक्राउ पर्नेमा दार्चुला घर भइ महानगरीय प्रहरी वृत्त, गौशालामा कार्यरत प्रहरी जवान उपेन्द्र सिंह छन् ।
प्रहरी जवान सिंहले आइतबार वनकालीस्थित घरमै आएर आफूलाई बलात्कार गरेको पीडित युवतीको दाबी छ ।
‘अहिले म्याद थप गर्न पठाएका छौं’, बस्नेतले भने । जाहेरी दर्ता भएपछि प्रहरीले उनको स्वास्थ्य परीक्षण समेत गराएको छ ।
म्याद थप गरेपछि बयान लिने प्रहरी तयारी छ । अनुसन्धानमा संलग्न अधिकृतहरुका अनुसार जवान र पीडित भनिएको युवतीबीच पहिल्यैदेखि चिनजान रहेको पाइएको छ ।तर, दुईबीचको सम्बन्धबारे विस्तृतमा खुलिसकेको छैन ।
