म्याग्दी बाढीपहिरो अपडेट : ३५ घर पुरिए, ७० परिवारलाई सुरक्षित स्थानमा सारियो
म्याग्दी : अविरल वर्षापछि म्याग्दीमा आएको बाढीपहिरोमा परी ३३ जनाभन्दा बढी बेपत्ता भएका छन् । विभिन्न स्थानमा गरी ३५ घर पुरिएका छन् ।
पहिरोले सडक तथा पैदलमार्ग बगाएकाले उद्धारकर्ता घटनास्थल पुग्न सकेका छैनन् । जिल्ला विपद् व्यवस्थापन समितिका अनुसार पहिरोमा पुरिएर धौलागिरि गाउँपालिका-६ मराङमा २१, वडा नं ७ ताकममा ३, मालिका गाउँपालिका-७ बिममा विष्णु शर्मा र इच्छा पौडेलसहित ८ जना बेपत्ता छन् । मालिकाकै वडा नं ६ दुखुमा खोलाले बगाएर एक जना बेपत्ता छन् ।
त्यसै गरी मराङमा २०, ताकममा ५ र बिममा १० घर पहिरोमा पुरिएका छन् । मालिका गाउँपालिका-४ देवीस्थानमा पनि ५ घरमा पहिरोले क्षति पुर्याएको स्थानीयले बताएका छन् ।
बाढीले गलेश्वरस्थित राहुघाट खोलाको बेलिब्रिज बगाउँदा बेनी-जोमसोम सडकमा यातायात अवरुद्ध भएको छ । जिल्ला विपद् व्यवस्थापन समितिका अनुसार घर पुरिएका र जोखिममा परेका गरी कुल ७० परिवारलाई सुरक्षित स्थानमा सारिएको छ ।
