पूर्व सांसददेखि पाँचतारे होटलबाट कर छली, ३५ दिनभित्र नबुझाए सम्पत्ति लिलामि गरिने
पूर्व सांसददेखि पाँचतारे होटल तथा रिसोर्टले कर छल्ने गरेको पाइएको छ । महालेखा नियन्त्रक कार्यालयले सरकारी राजश्व तिर्न बाँकी रहेका १ सय २३ जना व्यक्ति तथा फर्महरुको नामावाली र तीनपुस्ते विवरण सार्वजनिक गर्दै ३५ दिनभित्र सरकारी बाँकी रकम तिर्न सूचना प्रकाशन गरेसँगै यसबारे खुलासा भएको हो । ३५ दिनभित्र रकम तिर्न नआए उसको नाममा रहेको सम्पत्ति लिलामी प्रक्रियामा लैजानेसमेत सरकारले चेतावानी दिएको छ ।
पटकपटक सरकारी राजश्व तिर्न आग्रह गर्दा र सूचना दिँदा पनि नतिरेको भन्दै महालेखा नियन्त्रक कार्यालयले याक एण्ड यति होटललाई ३५ दिनभित्र १६ करोड करोड ३३ लाख ५४ हजार ४ सय ५२ रुपैयाँ तथा त्यसमा नियमानुसार लाग्ने ब्याजसमेत तिर्न सार्वजनिक सूचना दिएको छ । त्यस्तै होटल अन्नपूर्णले सरकारले १६ करोड ८ लाख रुपैयाँ तिर्न बाँकी रहेको भन्दै तिर्न आउन सूचना जारी गरेको छ । तप्त बहादुर बिष्ट सञ्चालक रहेको होटल अन्नपूर्णले सरकारलाई १६ करोड ८ लाख ३० हजार ४ सय ३७ रुपैयाँ तिर्न बाँकी नै छ ।
त्यस्तै दिनेश बहादुर विष्ट अध्यक्ष रहेको होटल सोल्टीले पनि नेपाल सरकारलाई ८ करोड ४३ लाख ७१ हजार १ सय ४० रुपैयाँ तिर्न बाँकी रहेको देखिएको छ । पाँचतारे होटल सोल्टीले विगत लामो समयदेखि सरकारी बक्यौता नतिरेको र पटकपटक ताकेता गर्दा पनि सरकारी राजश्व तिर्न नआएको भन्दै ३५ दिनभित्र उक्त रकम र त्यसमा नियमानुसार लाग्ने ब्याज तिर्न नआए लिलामीमा लैजाने चेतावानी दिइएको छ ।
त्यस्तै मिनी क्यासिनो सञ्चालक सुरेन्द्र बहादुर सिंहले पनि नेपाल सरकारलाई ७ करोड ५३ लाख ६८ हजार ४८ रुपैयाँ तिर्न बाँकी रहेको देखिएको छ । ह्याप्पी आवर प्रालि नामक मिनी क्यासिनो सञ्चालन गर्ने गरेका सिंहले नेपाल सरकारलाई साँडे ७ करोडभन्दा बढी रकम तिर्न बाँकी रहेको देखिएको हो । उनलाई पनि ३५ दिनभित्र रकम तिर्न आउन सार्वजनिक सूचना प्रकाशन गरिएको छ ।
